БИШКЕК, 10-дек. — Sputnik. Премьер-министр Сапар Исаков АКШда өткөн Barrington Ice Arena эл аралык турниринде биринчи орунду жеңип алган Бишкек шаарынын "Алга Бишкек" жаш курама командасына ыразычылык кат жана белектерди тапшырды. Бул туурасында өкмөттүн маалымат кызматынан билдиришти.
Исаков жаш спортчуларды өкмөт үйүндө кабыл алып, турнирдеги ийгиликтери менен куттуктап, алар ата мекендик спорттун жаңы тарыхый барагын ачып жатканын белгилеген.
"Силер биздин сыймыгыбызсыңар. Мен үчүн силер менен жолугуу абдан чоң кубаныч. Жаш курагыңарга карабай эмгегиңер жана тырышчаактыгыңар менен ийгиликке жетип, өзүңөрдүн теңтуштарыңар жана чоңдор үчүн да үлгү боло алдыңар. Бул силердин чоң спортко карай алгачкы кадамыңар. Алдыда дагы жаңы ийгиликтер күтүп турат деп ишенебиз, ошону күтөбүз", — деп айтылат куттуктоо сөзүндө.
Жаш спортчулар АКШнын төрт командасы менен күч сынашкан. Алгачкы беттешинде "Ice Dogs 2" командасы менен кез келип 11:7 эсебинде утулуп калышкан. Бирок экинчи жана үчүнчү айлампада атаандаштарын чоң айырма менен жеңип чыккан. Оюндун финалында биринчи айлампада утулуп калган "Ice Dogs 2" командасы менен чыгып, тер агызган мээнет менен 8:7 эсебинде жеңишти камсыздашкан.
