Ысык-Көлдү жыл бою киреше алып келген аймакка кантип айлантабыз?
19:05 05.10.2026 (Жаңыртылды: 09:49 12.10.2026)
© Фото / Асел Сыдыкова
Жазылуу
Ысык-Көлдү Гонконг, Дубай, Белиз сыяктуу моделдерге жакын деңгээлде өнүктүрүү үчүн "Асман", "Свит Тамчы" сыяктуу келечектүү долбоорлор ишке ашырылып жатат. Бул тууралуу “Экономикалык панорама” уктуруусунда экономист-изилдөөчү Улукман Мамытов билдирди.
Анын айтымында, Кумтөр — облустагы тоо-кен тармагындагы маанилүү долбоорлордун бири. Бирок ошол эле учурда экологияга зыян келтирген оор өндүрүш болбошу керек.
“Ысык-Көлдө туризм экономиканын негизги тармактарынын бири экени белгилүү. Жайкы жана кышкы туризм активдүү өнүгүүдө. Туризм жаатында инфраструктура да акырындап алдыга жылып жатат. Туристтер өлкөгө тышкы валютаны алып келип, экономикага салым кошууда. Бирок туризмде сезондуулукка гана басым жасабай, ысык булактарга да туристтерди тартууга аракет кылышыбыз керек. Ошондой эле сандан сапатка өтүү зарыл. Башкача айтканда, турист өлкөдө 500 доллар эмес, 1000–2000 доллардай каражат калтыра турган шарт түзүлүшү керек. Ал үчүн туристтер акча коротууга кызыкдар боло турган объектилерди жана кызматтарды көбөйтүү зарыл. Аймакта "жашыл экономика" багыты да колго алынып, бул жаатта иштер жүргүзүлүүдө. Айыл чарбасы жагынан алганда, Ысык-Көл облусу үч зонага бөлүнөт. Балыкчы тарап кургак, Каракол жаан-чачындуу жана жашыл аймак болсо, Чолпон-Ата тарап мээлүүн келет. Демек, Каракол тарапта мал чарбачылыгы көбүрөөк өнүксө, кургак зоналарда дыйканчылык басымдуу”, — деди Мамытов.
Ал Балыкчынын логистика жаатындагы потенциалы жогору экенин, бул аймакты кургак порт катары пайдаланууга жакшы мүмкүнчүлүк бар экенин кошумчалады.
