БИШКЕК, 21-авг. — Sputnik. Астанада өтүп жаткан көк бөрү боюнча дүйнө биринчилигинде кыргыз улакчылары Монголия менен беттешүүгө чыгат. Бул тууралуу Көк бөрү федерациясынын вице-президенти Жыргалбек Саматов билдирди.
Казак улуттук спорттун түрлөрү боюнча ассоциациянын биринчи вице-президенти Ерлен Оспанов эреже боюнча оюнга чыккан командалар аттын арткы бутундагы такаларын чечилиш керек болчу деген пикирин айткан.
Саматов эки ортодо түшүнбөстүктөр жаралып кеткенин белгиледи.
"Сүйлөшүүлөрдүн соңунда кайра Монголия менен беттешке чыгары туурасында чечим чыкты. Бирок азырынча оюндун убактысы белгилүү боло элек", — деди Саматов.
Ошондой эле ал аттардын арткы буттарынын такасын чечүү көкпардын эрежеси деген менен жаратылыштын мыйзамдары эрежеден жогору турарын кошумчалаган.
Белгилей кетсек, Казакстанда "ЭКСПО-2017" эл аралык көргөзмөсүнүн алкагында түрк элинин салттык спортуна кирген "көкпар" (көк бөрү) оюну боюнча дүйнө чемпионаты 20-28-август күндөрү Астананын "Казанат" ат майданында өтүүдө.
