БИШКЕК, 16-авг. — Sputnik. Кыргызстандын көк бөрү боюнча улуттук курама командасынын эң мыкты оюнчуларынын бири Манас Ниязов Астанада өтчү дүйнөлүк чемпионатка барбай калды. Анын командага кирбей калышына казак тараптын кийлигишүүсү себеп болгон деген божомолдор социалдык тармакка байма-бай тарап жатат.
Белгилей кетсек, Казакстанда "ЭКСПО-2017" эл аралык көргөзмөсүнүн алкагында түрк элинин салттык спортуна кирген "көкпар" (көк бөрү) оюну боюнча дүйнө чемпионатына катышуу үчүн Кыргызстандын курама командасы 15-август күнү Астанага барган.
Кыргызстандын Көк бөрү федерациясы Манас Ниязовдун улуттук курамга кошулбай калганына так түшүндүрмө бере алган жок.
"Бул боюнча биз эч кандай комментарий бере албайбыз. Жөн гана командада өзгөрүүлөр болду. Астанага барчу топтон бир гана Манас Ниязов эмес, Бактияр Жапакеев да чыгарылган", — деп федерациянын маалымат кызматынан билдиришти.
Ал эми Манас Ниязов болсо федерациянын мындай чечими ал үчүн күтүүсүз болгонун айтат.
"Улуттук курама команда менен чогу эле оюнга даярданып жүргөм. Бирок жолго аттанууга эки-үч күн калганда мени командадан чыгарып коюшту. Казак тарап мени келбесин деген кептерди да угуп жатам. Канткен күндө да бул Көк бөрү федерациясынын чечими болду да. Демек алардын чечимин сыйлашыбыз керек. Бирок барсам жакшы болмок. Кыргызстандыктардын жеңиш менен келишине үмүт артам!" — деди Ниязов.
Ал ошондой эле улуттук курама командадан ушул мелдеште гана чыгарылганын белгилеп, башка оюндарга катыша бере турганын билдирди.
Кыргызстандын курама командасына төмөнкү оюнчулар кирген.
- Башкы машыктыруучу Ислам Тазабеков.
- Жолдошбек Орозбаев (Ынтымак), минген аты — Арбат
- Тынчтык Кабылбеков (Ынтымак), минген аты — Торпедо
- Карыпбек Эшиев (Ынтымак), минген аты — Эрке-тору
- Урмат Раушан уулу (Ынтымак), минген аты — Ахиллес
- Кубаныч Султан уулу (Биримдик Аю), минген аты — Атаман
- Нурманбет Койчукеев (Биримдик Аю), минген аты — Туман
- Рустам Тыналиев (Биримдик Аю), минген аты — Комбат
- Таштемир Замирбек уулу (Достук), минген аты — Алай
- Аскат Батырбек уулу (Достук), минген аты — Токмок
- Сейитбек Анарбек уулу (Ынтымак), минген аты — Алтын-Каз
- Акбар Иманбеков (Достук), минген аты — Рекорд
- Нуржан Мелисбек уулу (Ынтымак), минген аты — Бойка
