БИШКЕК, 29-сен. — Sputnik. Эртең, 30-сентябрда, Бишкектин айрым райондорунда суу болбойт. Бул тууралуу мэриянын маалымат кызматы билдирди.
"Бишкексууканал" башкармалыгынын билдирүүсүнө ылайык, 30-сентябрда саат 9:00дөн 21:00гө чейин борбордун айрым райондорунда ичүүчү суу токтотулат.
"Тоголок Молдо суу тосмосунда жана суу түтүктөрүндө техникалык тейлөө жана оңдоо иштери жүргүзүлгөнүнө байланыштуу суу өчүрүлөт. Панфилов, Фрунзе, Манас көчөлөрү менен чектешкен аймактагы турак үйлөрдө, мектептерде, бала бакчаларда, саламаттык сактоо мекемелеринде жана башка социалдык жана тиричилик объектилерде суу болбойт", — деп айтылат билдирүүдө.
Бишкек шаарынын мэриясы келтирилген ыңгайсыздык үчүн кечирим сурап, шаар тургундарынан ичүүчү суу камдап алууну өтүндү.
