Жалал-Абаддагы тарбиячы: балдарды урган эмесмин, видео монтаждалган

© AFP / TOBIAS SCHWARZБала бакчадагы балдар. Архив
Бала бакчадагы балдар. Архив - Sputnik Кыргызстан
Жазылуу
Буга чейин окурман тарбиячынын наристелерге кыйкырып-өкүрүп, жулкулдатып, балдардын бирин чекеге чапкан видеосун жиберген.

БИШКЕК, 22-ноя. — Sputnik. Жалал-Абаддагы бала бакчада бөбөктөрдү кагып-силкип, уруп жаткан тарбиячы менен Sputnik Кыргызстан агенттигинин кабарчысы байланышып окуя боюнча комментарий алды.

Эскерте кетсек, буга чейин окурман тарбиячынын наристелерге кыйкырып-өкүрүп, жулкулдатып, балдардын бирин чекеге чапкан видеосун жиберген.

Бул боюнча тактай келгенде видео дүйшөмбү күнү Жалал-Абад шаарынын №21 "Искора" (мурдагы "Учкун") бала бакчасында тартылганы белгилүү болду. Андагы Ширин аттуу тарбиячы видео монтаждалышы мүмкүн экенин айтууда.

"Мен азыр шок абалдамын, бул жөнүндө түшүнбөй турам. Болушу мүмкүн эмес. Видео монтаждалышы мүмкүн. Ата-энелер "көптөн бери даярдандык" дейт, директорго өчөшкөндөрдүн залакасы мага тийди окшойт. Мен бул жерде 5-6 жылдан бери иштейм. Негизи эле көптөн бери бул иштен кетем деп жаткам. Бирок директор "сен жакшы тарбиячысың, сага эч ким арызданбайт, бизде иштеп тур" деп кармап жаткан. Анан кечээ арыз жазып кетип калдым", — деди тарбиячы.

Ата-энелердин айтымында, мындай көрүнүш ал жерде байма-бай кайталанарын, балдары кээде көгала болуп келерин айтып нааразы болушкан. Азыркы тапта укук коргоо органдарына арыз жаза башташты.

Жаңылыктар түрмөгү
0