05:01 24 Аяк оона 2018
Түз эфир
  • USD68.8080
  • EUR81.1487
  • RUB1.0386
Дин аалымы Абдышүкүр Нарматовдун архивдик сүрөтү

Абдышүкүр Нарматовдун үйүн карактагандар табылды. Башка кылмыштары да ачыкталууда

© Фото / Руслан Абдрахманов
Коом
Кыскача шилтеме алуу
877 0 0

Милиция Жылдызбек Бекмурзаев аттуу жаранга издөө салып, "жалгыз жарым кармайбыз деп тобокелге барбагыла, ал куралдуу жана кооптуу" деп эскертти.

БИШКЕК, 15-сен. — Sputnik. ИИМ Дин аалымы Абдышүкүр Нарматовдун үйүнө кирген жана дагы бир нече оор кылмыштарды жасагандар уюшкан кылмыштуу топтун мүчөлөрү экендигин аныктап, алардын биринин изине түштү. Бул туурасында мекеменин маалымат кызматынан кабарлашты.

"Криминалык милиция кызматынын ыкчам кызматкерлери кооптуу кылмыш тобунун изине түшүп, алар жасаган оор жана өзгөчө оор кылмыштардын бетин ачты. Кылмыштуу топтун бир нече ирет адам өлтүргөн, курал менен кол салган, каракчылык жана чоң уурулук жасаган мүчөсү кармалды", — деп билдирди Ички иштер министрлиги.

Акчага туйтунуп, адам канына забын болгондор

Милициянын берген маалыматына караганда, алар бир нече миллиондогон акчаларды уурдап, адам канына забын болгон.

Алар быйылкы май айында дин аалымы Абдышүкүр Нарматовдун үйүнө ууруга кирип, бир айга жетпеген убакытта Чүй облусунун Аламүдүн районундагы Ленин айылындагы акча алмаштуруучу жайдан 850 000 сомду карактап кетишкен. Ал эми кылмыш учурунда пайдаланылган "SsangYong Musso" автоунаасынын ээсинин, таксист болуп иштеген 57 жаштагы Юсуфовдун сөөгү үч күндөн кийин ошол айылдагы жардан табылган. Милиция анын кыйнап, өлтүрүлгөндүгүн айткан.

Көп өтпөй Жалал-Абадда "Лига-Трейд" ишканасынан 290 000, "Партнер-Нефть" компаниясынан акча жана 450 тонна майдын талону, көп өтпөй Ош шаарындагы "Даннур-Юг" фирмасынан 60 миң доллар жана 2 миллион сом уурдалып, жалпы чыгым 7 миллион сомдон ашкан.

Ал эми былтыр да бир катар компанияларды карактаган, алардын ичинен 2017-жылдын февралында Бишкек шаарындагы "Цзи Сянь" кытай ресторанына жасалган каракчылык коомчулукка дүң болгон. Бул топтун иши улана берген. Көп өтпөй мартта "НСК" камсыздандыруучу компаниясы, андан соң "Прод-Импекс" ишканасы каракталып, ири суммадагы акча уурдалган. Аларга кошумча "Фирдаус" жана "Трейд", "Крос Инк" фирмалары жабыр тарткан.

Бул кылмыштуу топтун Россияда жашырынып жүргөн мүчөсү Москванын тартип коргоо органдарынын кызматкерлери менен чогуу аталган калаадан кармалган.

Таратылган маалыматта ИИМдин криминалдык милициясынын ыкчам тергөөчүлөрү жогорудагы кылмыштарды жасады деп шектелгендердин ким экендигин иликтеп, иштин учу чыга баштаганда алардын артынан түшкөндүгү айтылат. Алар шек алып калып, изин жашырып, турган жерин улам алмаштырып, изин жашырып, ар кайсы аймактарга сиңип кетип турган.

Жиптин учугу

2018-жылдын август айында милиция Ысык-Көл облусунан жогорку кылмыштарга шектүү деп ушул эле облуста туулган 25 жаштагы Б.Ы. аттуу жаранды кармаган. Маалыматта ал буга чейин уурулук, бейбаштык жана баңги заттарына аралашканы үчүн соттолгону айтылат.

"Милициянын ыкчам кызматкерлеринин буга чейинки шеги туура болуп чыкты. Анын шериги Талас облусунда туулган, буга чейин аял зордуктоо, каракчылык үчүн издөөгө алынган 32 жаштагы Жылдызбек Бекмурзаев аттуу жаран болуп чыккан. Ага Кыргызстанда жана бир нече оор кылмыштар үчүн Казакстанда издөө жарыяланган", — деп айтылат ИИМдин маалыматында.

2017-жылы ИИМ Бишкек жана Чүй облусунда бир нече оор кылмыштарды жасаган уюшкан кылмыштуу топ кармалгандыгын кабарлаган. Алардын эсебинде бир нече оор кылмыштар — талап-тоноочулук жана ири көлөмдөгү куралдарды уурдоо боюнча күнөө тагылган.

Ал эми аны уюштургандардын бири качып кетүүгө үлгүргөн. Анткен менен ИИМ кызматкерлери анын кайда жүргөндүгүн аныктап чыккан. 2017-жылдын 21-июлунда Казакстандын Костанай шаары менен Кыргызстандын ички иштер органдарынын тиешелүү бөлүмдөрү биргеликте иштеп алып барып, издөөдөгү Жылдызбек Бекмурзаевди кармаган. Ал Казакстандын чек арасына мыйзамсыз өтүп, Алматы, Тараз, Костанай шаарларында жашырынып жүргөн. Аны мекенине кайтарып берүү маселеси көтөрүлгөндө, казак бийлиги Бекмурзаевди экстрадициялоодон баш тартып, чек араны мыйзамсыз өткөндүгү үчүн жарым жылга эркинен ажыратып, абакка кескен. Ал көп өтпөй түрмөдөн качып кеткен. Казакстан ага издөө жарыялаганы менен үйүнө кайтып келген Бекмурзаев жаңы кылмыш тобун негиздеген. Ошол топ менен жогоруда саналган, 2018-жылда болгон бир нече кылмаштарды жасаган деп шектелүүдө.

Жалгыз-жарым кармайбыз дебегиле!

ИИМдин Криминалдык милициясы жарандарга кайрылып, бул адам тууралуу маалымат билсе, милициянын (312) 26-62-61; (550) 101-086; (558) 919-199; (559) 148-310 номерлүү телефондоруна кайрылып, маалымдоону өтүнөт.

Маалыматтын купуялуулугу сакталып, сыйлык карала турганы айтылды. Милиция бул адам куралдуу жана кооптуу болгондуктан, аны көргөн-билгендер өз алдынча кармоого аракет кылбаш керектигин эскертет. Учурда ИИМдин Криминалдык милиция кызматы аны кармоо үчүн тиешелүү иш-аракеттерди жүргүзүп жаткандыгы айтылган.

Тема боюнча

Өлкөгө АКШ менен Прибалтикадан мыйзамсыз машина алып келгендер тутулду
Кармалган шектүү Улан Саляновдун кандайча атылганын айтып берди
Белгилер:
кылмышкер, эскертүү, талап-тоноо, издөө, уюшкан кылмыштуу топ, адам өлтүрүү, Казакстан, Кыргызстан, Россия, Москва
Колдонуу эрежелериПикирлер

ЭҢ МААНИЛҮҮ