БИШКЕК, 7-фев. — Sputnik. Бишкекте бет капчан адамдар "Цзисян" кытай кафесине кол салып, кассадан 100 миң сом алып кетишти. Бул тууралуу ИИМ билдирди.
Маалыматка ылайык, кол салуу 6-февраль күнү саат 21:55те болгон. Ал эми окуяга күбө болгон Сезим аттуу официант кыз Sputnik Кыргызстан агенттигинин кабарчысына төрт адам кол салгандыгын айтып берди.
"Мен кардарлар кирип келди го деп ойлогом. Бирок алар куралчан жана бет капчан экен. Кирип эле бир ирет куралдан ок атышты. Мен коркуп кетип, ашканага чуркадым. Аңгыча артыбыздан бирөө чуркап келип, баарыбызды жерге жаткырды. Тоноо беш мүнөткө созулуп, заматта чыгып кетишти. Эч ким жабыркаган жок", — деди официант кыз.
Кафенин ээси Ляо Нананын айтымында, куралчан адамдар дароо эле ашканага бет алышкан.
"Кол салуу болгонго чейин мен чыгып кеттим эле. Алар кассадан акчаны алаары менен 54 жаштагы апамдын колундагы шакегин да чыгарып кетишиптир", — деди ал.
Учурда аталган факт боюнча тергөө башталды.
