БИШКЕК, 31-май — Sputnik. Россиядагы кыргыз элчилиги аталган өлкөнүн жарандыгы жок айрым адамдарга үстүбүздөгү жылдын 1-июнунан баштап транспортту башкарууга коюла турган чектөөлөр боюнча түшүндүрмө берди.
Чектөө же тыюу салуу боюнча мыйзам долбоору 2013-жылы кабыл алынган. Мыйзамда 2015-жылдын 1-июнуна чейин улуттук айдоочулук күбөлүктү Россиянын күбөлүктөрүнө алмаштыруу мүмкүнчүлүгү каралган. Андан соң бул мөөнөт 2017-жылдын 1-июнуна жылдырылган.
"Мыйзамда каралган убакыт аралыгында Россия Федерациясынын аймагында айдоочулук менен байланыштуу кызматтарда иштеген чет элдиктер, анын ичинде кыргызстандактар дагы, улуттук айдоочулук күбөлүктү Россиянын документине алмаштырышы керек болчу", — деп билдиришти өкүлчүлүктөн.
Ошондой эле бул боюнча кыргыз диаспорасы менен болгон жолугушууларда айтылганын, мекендештерди иштеп жаткан өлкөнүн мыйзамын сыйлоого чакырык ташталганы кошумчаланды.
Маалыматтарга караганда, ЕАЭБдин курамындагы башка мамлекеттер дагы сүйлөшүүлөрдү жүргүзүп жатат.
Учурда кыргыз элчилиги Россиядан улуттук айдоочулук күбөлүктөрдү колдонууга тыюу салуу боюнча расмий билдирүүнү күтүүдө.
