БИШКЕК, 18-июл. — Sputnik. Экономика министрлиги уруксат берсе, Zhong Ji Mining Company кытай-кыргыз ишканасын пландан тышкары текшерүү болот. Бул тууралуу Экологиялык жана техникалык коопсуздук боюнча мамлекеттик инспекциясынын директору Жолдошбек Жунушов Бишкектеги маалымат жыйын учурунда билдирди.
Анын айтымында, компанияда мыйзам бузуулар болуп жаткандыгы боюнча элден бир нече пунктудан турган кайрылуу түштү.
"Жергиликтүү тургундар компания жардыруу, курулуш иштери болгондо чаңды басаңдатып суу чачпай жатканын айтышууда. Ошондой эле иче турган суу булганып, ажатканалары жок экенин белгилешти. Биз бул боюнча плансыз текшерүү жүргүзүү үчүн Экономика министрлигинен уруксат алышыбыз керек. Макулдук берилген сааттан баштап текшере баштайбыз", — деди Жунушов.
Zhong Ji Mining Company КР рыногунда 2006-жылдан тарта иш алып барат. "Кыргыз алтын" мамлекеттик ишканасынын карамагындагы Солтон-Сары кенинде баалуу металл казат. Божомолдор боюнча, мында алтындын жалпы кору 20 тоннанын тегерегинде. Юстиция министрлигинин маалыматына таянсак, "Zhong Ji Mining Company кытай-кыргыз ишканасы" ЖЧКсынын жетекчиси Сюй Говэй, ал эми түптөөчүсү "Чайна Голд Гонконг Бучук Майнинг Компани Лимитед". Негизги ишмердик түрү — табигый минералдарды жана тоо тектерин казуу. Учурда анын колунда чалгындоо иштерине жана алтын иштетүүгө лицензиялары бар.
