БИШКЕК, 31-май — Sputnik. Бишкекте каршы тилкеге чыгып жол тыгынын пайда кылган айдоочу мушташканга чейин барганын Sputnik Кыргызстан агенттигине окуяга күбө болгон жаран билдирди.
Окуянын видеосун жиберген күбөнүн айтымында, каршы тилкеге чыккан Lexus унаасынын айдоочусу мушташканга чейин барган.
"Видеого тартылган окуя 30-май күнү "Дасмия" ресторанынын жанында болгон. Lexus унаасы каршы тилкеге чыга калган, ага өз жолу менен келе жаткан Toyota жеңил унаасы каршы чыккан. Эреже бузган айдоочу беркинисине кол көтөргөнгө аракет кылып, экөө мушташа кетишти. Биз аларды арачалоого аракет кылдык", — деди күбө.
Ал эми бул окуя боюнча Бишкек шаардык Кайгуул милициясы мушташтын себеби тактоо үчүн айдоочуларды издеп жаткандыгын кабарлады. Ал ошондой эле Кайгуул милиция жол тыгынын пайда кылган айдоочуга карата мыйзам чегинде чара көрүшү керектигин кошумчалады.
Шаардык Кайгуул милициясынын маалымат кызматынын өкүлү Таалай Бугубаевдин айтымында, автоунааларга ээлик кылган адамдар изделүүдө.
"Азыр видеонун аркасы менен унаанын мамлекеттик номерлери такталып, айдоочулар изделүүдө. Анын негизинде мушташтын келип чыгуу себебин аныктайбыз. Учурда тиешелүү аракеттер көрүлүп жатат", — деди Бугубаев.
Ошондой эле ал окуяга катышкан же күбө болгон адамдар тарабынан арыз жазыла электигин кошумчалады.
Эгер кандайдыр бир окуяларга күбө болуп, сүрөт, видео тартсаңыз Sputnik Кыргызстан агенттигинин 0706 566 544 WhatsApp номери аркылуу билдириңиз.
