БИШКЕК, 24-мар. — Sputnik. Ошто милициянын подполковнигин өлтүрүүгө шектелип төрт жаран кармалды. Бул тууралуу Ош ШИИБдин маалымат кызматынан Sputnik Кыргызстан агенттигинин кабарчысына билдиришти.
Кармалган шектүү жаран
© Фото / Зульфия Тургунова
"Милициянын подполковниги Таирбек Уларовдун өлүмүнө шектүүлөр кармалып, убактылуу кармоочу жайга киргизилди. Алардын бири аял болсо, үчөө эркек. Арасында эки шектүү буга чейин сот жообуна тартылган жарандар", — деп айтылат билдирүүдө.
Эске салсак, милиция кызматкери 21-март күнү үйдөн чыгып кеткен бойдон кайтып келген эмес. Ал эми бүгүн Ош шаардык ИИБдин маалымат кызматы анын сөөгү Учар айылынын Набережная көчөсүндө жолдун боюнда токтоп турган көк түстөгү Mitsubishi үлгүсүндѳгү унаадан табылганын билдирген.
