БИШКЕК, 15-мар. — Sputnik. Ошто эки жыл мурун агасын өлтүрүүгө шектелген жаран 72 жаштагы энесине бычак сайып жарадар кылгандыгы тууралуу Ош облустук ИИБдин маалымат кызматынан кабарлашты.
Билдирмеге карганда, окуя Кара-Кулжа районуна караштуу Тоготой айылында катталган.
"Шектүү үйүндөгү чыр-чатактан улам кемпирге бычак сайган. Учурда аталган факты боюнча Кылмыш жаза кодексинин 234-беренеси (бейбаштык) боюнча кылмыш иши козголду. Ал эми шектүү убактылуу кармоочу жайына киргизилип, жаракат алган аял ооруканага жеткирилди", — деп айтылат маалыматта.
"Кармалган киши 2015-жылы апрель айында өзүнүн агасына бычак сайып өлтүрүүгө шектелип жатат. Жарандын туугандары кылмыш ишин жашырып арыз жазбастан маркумду көөмп коюшкан", — деп маалымат кызматынан кабарлашты.
Учурда соттук медициналык экспертиза дайындалып, эксгумация жүргүзүлгөнү жатат.
