БИШКЕК, 5-дек. — Sputnik. Алып баруучу, шоумен Бакыт Букаевди өлтүргөн эки киши (Абдибаитов жана Худайбердиев) үй-мүлкүн камакка алуу менен 17 жылдан 18 жылга чейин кесилгенин Бишкек шаарынын Ленин райондук прокуратурасы билдирди.
Маалыматка ылайык, Бакыт Букаевди өлтүрдү деп шектелген эки жаранга 26-октябрда өкүм чыгып, алар Кылмыш жаза кодексинин "мыкаачылык менен адам өлтүрүү", "каракчылык" беренелери боюнча айыптуу деп табылган. Аталган көзөмөл органынын билдирүүсүндө, бул эки жаран 2013-жылы 12-ноябрда алып баруучунун мүлкүн тартып алуу максатында аны моюн тарапка бычак менен бир нече ирет сайган. Алган жаракатынан улам шоумен ошол жерден каза болгон.
Соттун өкүмү менен Абдибаитов 18 жылга, Худайбердиев 17 жылга эркинен ажыратылды.
