БИШКЕК, 16-апр. — Sputnik. "Альянс" акча алмаштыруу жайлары ассоциациясынын жетекчисинин орун басары Думан Рыскулов бюролорду жабуу боюнча мыйзам долбооруна нааразычылыгын билдирип, демилгечилердин аргументин негизсиз деп сыпаттады.
Белгилей кетсек, Жогорку Кеңештин депутаттары акча алмаштыруу жайларын жабууга багытталган мыйзам долбоорун коомдук талкууга алып чыккан. Эл өкүлдөрү менчик бюролор операциялар тууралуу маалыматты жашырып, валюта курсун негизсиз жогорулатып, мындай аракети менен сомдун кунун кетирет деген жүйө келтирген.
“Экономикалык кырдаалга жана баанын олку-солку болушуна бардык жактан бизди күнөөлөп, жалаа жаап жатышат. Алмаштыруу бюролору үчүн доллар 100 же 10 сом болобу, айырмасы жок. Маржанын (сатуу менен сатып алуудагы айырма — ред.) көлөмү баары бир беш тыйындан ашпайт”, — деди Рыскулов.
Ошондой эле ал эртең курс канча болорун жана бүрсүгүнү кайсы баада интервенция кыларын Улуттук банк гана чечерин белгиледи. Ал эми өзгөчө абал киргенден бери акча алмаштыруу жайлары иштебей турганын эскертти.
Ошондой эле ал мыйзам долбоорунда өлкөдөгү инфляцияга акча алмаштыруу жайларын күнөөлүү кылып көрсөтүү акылга сыйбаган көрүнүш деп сыпаттады.
“Биздин ассоциацияда 350 акча алмаштыруу жайы бар, ал жакта 350-500 миллион сом айланат. Ал эми банктардын бир эле филиалында жарым миллиард сом бар, жада калса чакан банктарда дагы ошончо суммадагы акча айланып жүрөт. Эми байкап көрүңүз, кырдаалга ким таасир эте алат? 350 бюробу же бир филиалбы?” — деп таң калды ассоциациянын төрагасынын орун басары.
Рыскулов акча алмаштыруу жайлары Улуттук банкка күнүнө эки жолу курс боюнча отчёт берип, кечинде операциялар боюнча маалымат жөнөтө турганын айтты. Ошону менен катар эле маалыматтар Финансылык чалгындоо кызматына дагы түшүп турат. Мындан сырткары алар Соцфондго жана патентке акча төлөй турганын белгилейт.
Соңунда ассоциация Жогорку Кеңешке, президент менен өкмөттүн аппаратына дагы кат жолдой турганын кошумчалады.
