Путин Кыргызстандын калган карызын кечүү боюнча документке кол койду

БИШКЕК, 6-фев. — Sputnik. Россия президенти Владимир Путин Кыргызстандын РФ алдындагы карызын жөнгө салуу боюнча макулдашуунун протоколун ратификациялады. Мында бересе акчанын калган 240 миллион долларын жоюу каралган. Бул тууралуу РИА Новости жазып чыкты.

2012-жылы Кыргызстан менен Россиянын президенттери республиканын РФ алдындагы 488,9 миллион долларын кечүү боюнча макулдашкан. 2013-жылдын май айында Россия 188,9 миллионун кечип, калган 300 миллион доллар 2016-жылдын 16-мартынан тарта 10 жыл аралыгында этап менен жоюлмак. Кыргызстан 2016-жылдын 15-мартына чейин калган карыздын үстөк пайызын төлөп келген, 2013-жылдан тарта эсептегенде 7,98 миллион долларды түзгөн. Карызды кечкен кезектеги процесстен, тагыраагы, 2017-жылдын мартынан кийин макулдашуу боюнча Россияга 240 миллион доллар карызы калган.

2017-жылы экс-президент Алмазбек Атамбаев Путинге карыздын калганын кечүү өтүнүчү менен кайрылган. Июнь айында Кыргызстандын Россияга карызын өлкөнүн өнүгүшү үчүн расмий жардам берүүнүн алкагында кечүү боюнча макулдашуу протоколуна кол коюлган.

Бул карыз жоюлгандан кийин Кыргызстандын тышкы карызы 6,5 пайызга азаят. Республиканын мамлекеттик башкаруу секторунун ИДПга карата карызы 65,2 пайыздан 60,6 пайызга кыскармакчы.

Маалыматта финансылык көз караштан алганда карызды кечүү Россия үчүн федералдык бюджеттин кирешесин азайта турганы айтылган. Себеби макулдашуу боюнча 2016-жылдын 15-мартынан кийин дебитордун Россияга төлөмү каралган эмес.

2017-жылдын декабрынын биринчи декадасында президент Сооронбай Жээнбеков Кыргызстандын Россияга болгон карызын толугу менен кечүү боюнча өкмөттөр аралык келишимдин протоколуна кол койгон.