БИШКЕК, 9-дек. — Sputnik. Президент Сооронбай Жээнбеков Кыргызстандын Россияга болгон карызын толугу менен кечүү боюнча өкмөттөр аралык келишимдин протоколуна кол койду. Бул тууралуу өлкө башчынын маалымат кызматы билдирди.
Россия Кыргызстандын бардык карызын (488,9 миллион доллар) кечүү боюнча келишимге 2012-жылы 20-сентябрда кол коюлган. 2013-жылы Россия КРдин 188,9 миллион доллар карызын кечкен. Калган карыз он жыл аралыгында жылына 30 миллион доллардан кыскарып турмак.
"2017-жылдын 30-апрелине карата алынган маалымат боюнча Кыргызстандын Россияга болгон карызы 240 миллион долларды түзөт. Протоколго кол коюу менен Кыргызстандын Россияга болгон бардык карызын дароо кечүүгө жол ачылат", — деп айтылат маалыматта.
Протокол боюнча мыйзам 2017-жылы 2-ноябрда Жогорку Кеңеш тарабынан ратификацияланган.
240 миллион доллар өлчөмүндөгү карызды дароо кечүү мамлекеттик тышкы карыздын деңгээлин ички дүң өнүмгө карата 3,8 пайызга кыскартат. Эми бул протоколго Россиянын парламенти менен РФ президенти кол коюшу керек.
