БИШКЕК, 18-апр. — Sputnik. Нарындын Кочкор районунда күн электр станциясынын курулушу башталып, кийинки жылдан тарта электр энергиясы өндүрүлөт. Бул тууралуу Энергетика министрлиги билдирди.
Ведомство башчысы Таалайбек Ибраев АКШга болгон иш сапарынын алкагында Дүйнөлүк банктын вице-президенти жана финансы директору Жон Гандольфо менен жолугуп, мамлекеттик-жеке өнөктөштүк (ГЧП) менен ишке ашырылып жаткан "Кыргыз күн электр станциясы" пилоттук долбоорунун жүрүшүн талкуулаган.
"Нарын облусунун Кочкор районундагы Коңорчок тилкесинде курула турган бул станция өлкөдө кайра жаралуучу энергия булактарын өнүктүрүүдөгү маанилүү кадам болуп саналат. Долбоордун негизги өзгөчөлүгү — эң төмөнкү тариф сунуштаган инвестор ачык конкурс аркылуу тандалып алынганында. Учурда киловатт-саатына 4,1 цент сунуштаган China Power компаниясы менен макулдашуу түзүлдү. Курулуш 2026-жылы башталып, 2027-жылы ишке берилет", — деп айтылат маалыматта.
Башкысы, калк үчүн жеткиликтүү жана туруктуу тариф экенин белгилеген Ибраев долбоор Кыргызстандын энергетика тармагына жаңы стандарттарды киргизип, инвестиция тартуунун үлгүсү болуп берерин белгилеген.
Жолугушууда долбоордун экинчи раунду болгон Талас жана Баткен облустарында жаңы күн электр станцияларын куруу пландары да талкууланды.
Министрлик Дүйнөлүк банк буга чейин да Энергетика министрлиги менен биргеликте бир катар ири долбоорлорду ишке ашырып, өлкөнүн энергетикалык коопсуздугун чыңдоого олуттуу салым кошуп келерин кошумчалады.