Трампка кол салууга кимдин катыштыгы бар. Эксперттин пикири

Ларри Жонсон "АКШнын атайын кызматы Трампка кол салууга катышкан же компетентсиз болушту" деген пикирин айтты.
Sputnik
БИШКЕК, 15-июл. — Sputnik. ЦРУнун мурдагы аналитиги Ларри Жонсон Dialogue Works эфиринде президенттикке талапкер Дональд Трампка Пенсильваниядагы кол салуу боюнча АКШнын Жашыруун кызматын сындады.
"Американын атайын кызматы ишин так аткара алган жок, кечигип калышты. Контрснайпер балдардын видеосун көргөнгө чейин бул алардын таза эле компетентсиздиги деп эсептеп келгем", — деген Жонсон.
Анын айтымына караганда, атайын кызматтагылар ок чыгара турган кишини көргөн, жай иштеп (реакция жасап), эки жолу атып жибергенден кийин гана ата башташкан. Жонсон муну "атайын кызмат балким, Трампты өлтүрүү аракетине катышкан" деп сыпаттады.
"Эмне үчүн Жашыруун кызмат кол салууну алдын албагандыгына түшүндүрмө берилген жок? Муну актоого болбойт, тагыраагы, эки вариант бар. Же АКШнын атайын кызматынын жөндөмсүздүгү, шалаакылыгы же Трамптын көзүн тазалоого аракет кылган ички иштер (аракеттер)", — деп кошумчалаган аналитик.
Жонсон берген интерьвюсунда атайын кызматтагылардын куралды колдоно албагандыгын белгилеп, мындай көрүнүш аны таңдантпагандыгын айтты.
Аналитиктин айтымында, Жашыруун кызмат сыяктуу элиталык бөлүмдөрдө бардык эле учурда курал колдонууну беш колундай биле беришпейт.
АКШнын мурдагы президентине кол салууга күбө болгондордун биринин ЖМКга айтып бергенине караганда, Трампты күтүп жатканда имараттын чатырынан шектүү бирөөнү байкаган. Ал октун үнү жаңырганга чейин полиция кызматкерине айтууга эки ирет камынган.
Эске салсак, 14-июлда АКШнын мурдагы жетекчиси, күздө болчу кезектеги президенттик шайлоодогу негизги талапкерлердин бири Дональд Трампка куралдуу кол салуу болгон. Пенсильванияда тарапташтарынын алдында сүйлөп жатканда атылган ок анын кулагына тийген. Атайын кызмат кол салган кишини дароо өлтүргөнүн маалымдаган. Атышуудан ошол жердегилерден бир адам каза болуп, экөө оор жаракат алганы кабарланган.
Шектүү 20 жаштагы ошол жердик Томас Мэтью Крукс аттуу адам экенин айтышкан. Аны ок чыгаргандан кийин жок кылышкан. Крукс терс оюн ишке ашыруу үчүн сахна жайгашкан жерден 100 метрдей аралыкта, имараттын чатырында отурган.
Интернетке тарап кеткен видеодон аны кайтаргандар кулак тарабынан кан аккан Трампты калкалап алып кетип, атайын автоунаага отургузгандыгын көрүүгө болот.
Мелания Трамп күйөөсүнө кол салуу болгондон кийин америкалыктарга кайрылды