БИШКЕК, 20-сен. — Sputnik. Ош облусунда жайгашкан Кара-Суу районунун Баш-Булак айылындагы 480 орунга ылайыкташкан мектепте 1 620 бала окуп жатат. Мындай көйгөйдү Жогорку Кеңештин депутаты Алишер Козуев көтөрүп, жаңы мектеп салууга каражат бөлүнбөй жатканын билдирди.
Анын айтымында, бүгүнкү күндө окуучулар үч нөөмөт менен бир класста 40-50дөн отурат.
"Бул мектеп 1961-жылы салынган, 2008 жана 2015-жылдардагы жер титирөөдө дубалдарынан жарака кетиптир. Кыргыз жана орус тилдүү мектеп болгондуктан муктаждык аябай көп. Муну 2024-жылкы бюджетке киргизип, жок дегенде кошумча корпус болсо да башташ керек. Шаардан алыс, шарты катаал айылда болгондуктан бул мектепке тез арада көңүл буруу зарыл", — деди Козуев.
Аталган Насыр Примбердиев атындагы орто мектептин директору Гүлайым Ташиева балдарды окутуу кооптуу болуп калганын Sputnik Кыргызстандын кабарчысына билдирди.
"Мектептин пайдубалы акырындап чөгүп жатканы байкалып жатат. Сырттан өткөн ным мектептин ичиндеги дубалдарга таасир этип, тынымсыз үбөлөнүп турат. Полдорунун кээ бир жерлери чирип ыңгайсыздык жаратууда. Кээ бир класстардын шыбынан тамчы өтүп бузула баштады", — деди директор.
Ошондой эле ал жаңы мектеп куруп берүү өтүнүчү менен бийлик органдарына үч жылдан бери кайрылып жатышканын белгиледи.