БИШКЕК, 26-фев. — Sputnik. Борбордук чалгындоо башкармалыгынын директору Уильям Бернс Иран өзөктүк курал жасоого белсенбегенин билдирди. Бул тууралуу РИА Новости агенттиги жазды.
Бернстин айтымында, АКШ Иран өзөктүк курал боюнча программаны жаңылоо чечимин кабыл алды деп эсептебейт.
"Биз Иран лидери 2003-жылдын аягында токтотулган же кийинки убакытка жылдырылган өзөктүк куралды түзүү программасын кайрадан жаңылоо чечимин кабыл алды деп ойлобойбуз", — деген ал.
АКШ Ирандын өзөктүк куралга ээлик кылуусуна жол бербей тургандыгын бир нече жолу айткан. Бернс Иран биргелешкен комплекстүү пландар келишиминен чыккандан кийин өзөктүк курал жасоо мүмкүнчүлүгү жаралгандыгын айткан.
Өткөн жекшембиде Блумберг басылмасы эки дипломатка таянып материал жарыялады. Анда МАГАТЭ инспекторлору өткөн аптада Ирандан 84 пайызга чейин байытылган уран табышкандыгы, мындай көлөм менен өзөктүк курал жасоого болору жазылган. Макалага Ирандын өзөктүк энергия боюнча уюму жооп берип, фактылар бурмаланган деп сыпаттады. Ошондой эле уюмдан Ирандын өзөктүк энергетикасы тынчтыкка гана багытталганын белгилешкен.