БИШКЕК, 7-апр. — Sputnik. Кыргызстан бюджетинин элге кайтарымсыз акча берип, ишкерлерди салыктан толук бошотууга мүмкүнчүлүгү жок. Бул туурасында вице-премьер Эркин Асрандиев маалымат жыйын учурунда билдирди.
Вице-премьердин айтымында, өлкөдө социалдык төлөмдөр убагында аткарылып турушу үчүн кошумча жеңилдик берүүгө өкмөттүн чамасы жетпейт.
“Биз башка өнүккөн өлкөлөргө окшоп бекер кредит, бекер акча берип же салыктан толугу менен бошото албайбыз. Муну ачык айтыш керек. Бизде эң негизги максат — бюджеттин эсебинен айлык, жөлөк пул, пенсия алып жаткандарга мамлекет өз убагында акча берип туруу. Бюджеттин кошумча мүмкүнчүлүгү же стабилдүү фонддору бизде, тилекке каршы, жок”, — деди Асрандиев.
Ошондой ал буга байланыштуу бизнеске жардам көрсөтүүдө өкмөт реалдуу күчүн эске алып, анан эсептеп жатканын белгиледи.
Кыргызстандагы коронавирус
Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилди. Бул аймактарда саат 20:00дөн 7.00гө чейин көчөгө чыгууга тыюу салынган. Күндүз ооруканага, дарыканага жана дүкөнгө гана барууга уруксат берилген.
Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.