Кыргызстан менен Армениянын кызматташуусу боюнча 10 документке кол коюлду. Тизме
Жазылуу
БИШКЕК, 17-окт. — Sputnik. Садыр Жапаровдун Арменияга болгон расмий сапарынын алкагында Ереван шаарында эки өлкөнүн алакасын чыңдоого багытталган 10 документке кол коюлду. Бул тууралуу "Ынтымак ордодон" билдиришти.
Анда жарандардын өз ара сапар тартиби, 2027–2029-жылдарга кызматташуу боюнча жол картасы, билим берүү, илим, экология, пенсия менен камсыздоо, жеке маалыматтарды коргоо жаатындагы келишимдерге кол коюлган.
Жапаров кызматташуу тармактарынын арбышы алаканын активдешине шарт түзөрүнө токтолду.
"Биз соода, айыл чарба, транспорт, маалыматтык технологиялар, билим берүү жана туризм тармактарында кызматташтыкты кеңейтүү үчүн кеңири мүмкүнчүлүктөрдү көрүп турабыз. Белгиленген бардык багыттар боюнча биргелешкен күч-аракеттерибиз менен конкреттүү натыйжаларга жете аларыбызга ишенем", — деди ал.
Кол коюлган документтердин тизмеси:
Садыр Жапаров менен Армениянын премьер-министри Н. Пашиняндын биргелешкен билдирүүсү;
Министрлер кабинети менен Армения өкмөтүнүн ортосундагы жарандардын сапарлары жана жүрүү тартиби жөнүндө макулдашуу;
Кыргызстан менен Армениянын ортосундагы 2027–2029-жылдарга кызматташуу жөнүндө жол картасы;
Агартуу министрлиги менен Армениянын Билим берүү, илим, маданият жана спорт министрлигинин ортосундагы билим берүү жаатында кызматташуу жөнүндө макулдашуу;
Эки өлкөнүн Илим, жогорку билим берүү жана инновациялар министрлигинин ортосундагы билим берүү жана илим жаатында кызматташуу жөнүндө меморандум;
Жаратылыш ресурстары министрлиги менен Армениянын айлана-чөйрөнү коргоо министрлигинин ортосундагы Ысык-Көл жана Севан көлдөрүн сактоо боюнча кызматташтык жөнүндө өз ара түшүнүшүү меморандуму;
Социалдык фонд менен Армениянын Эмгек жана бакубаттуулук министрлигинин ортосундагы Пенсия менен камсыз кылуу жаатындагы кызматташуу жөнүндө макулдашуу;
Эки өлкөнүн Юстиция министрлигинин ортосундагы кызматташуу жөнүндө меморандуму;
Улуттук илимдер академиясы менен Армениянын Улуттук илимдер академиясынын ортосундагы кызматташтык жөнүндө меморандум;
Бишкек жана Ереван шаарынын ортосунда боордоштук мамилелерди түзүү жөнүндө макулдашуу.
