Камчыбек Ташиев канча тууганы жоопко тартылганын айтып берди
17:09 09.12.2025 (Жаңыртылды: 12:15 23.12.2025)
© Пресс-служба правительства / Алишер Алиев
Жазылуу
БИШКЕК, 9-дек. — Sputnik. УКМК төрагасы Камчыбек Ташиев айрым туугандары кылган иштери үчүн бүгүн түрмөдө отурганын, бул маселе боюнча ага басым жасагандар көп болгонун билдирди.
Ал "Регион ТВ" телеканалына маек курган.
"Ачык айтайын, бүгүн кудагыйым 2022–2023-жылдары кылган кылмышы үчүн түрмөдө отурат. Чыгаргыла деп бир тууган агам, кудасы, баласынын кайын журту, кимдер гана келген жок… Бирок мен эч кимисине жол берген жокмун. Ал адам отурат, мыйзамдуу жазасын алышы керек. Эгер мен өз туугандарыма мыйзамды иштетпесем, анда калгандар мага кантип ишенет? Бир тууган агамдын баласы ГАИ кызматкерин сөгүптүр, аны да камадык. Эгер мен аны камабай койсом, эртең ал прокурорду сөгөт, андан кийин акимди сөгөт. Коомдо тартип ошондо бузулат. Ошондой болбош үчүн, көзү өтүп кеткен бир тууган агамдын баласын да мыйзамдын негизинде жоопко тарттык, — деди ал.
Ташиевдин айтымында, бул үчүн туугандары аны жек көрүп калышкан, бирок ал муну "мамлекеттик тартипти орнотуу үчүн зарыл кадам" деп эсептейт. Принципиалдуу болбосо коопсуздукту камсыздаган органды жетектей албасын кошумчалады.
9 Бештин айы 2025, 16:43
