Мамлекеттик тилди билүүгө талаптарды күчөтүү сунушталууда
12:45 22.04.2025 (Жаңыртылды: 12:46 22.04.2025)
Жазылуу
БИШКЕК, 22-апр. — Sputnik. Мамлекеттик тилди билүүгө талаптарды күчөтүүнү сунуштаган мыйзам долбоору Жогорку Кеңештин эл аралык иштер, коргоо, коопсуздук жана миграция боюнча комитетинде биринчи окууда жактырылды.
Документ менен Мамлекеттик тил жана тил саясаты боюнча улуттук комиссиянын төрагасы Мелис Мураталиев тааныштырды. Анын айтымында, аталган мыйзам долбоору мамлекеттик тилди колдонуу чөйрөсүн жөнгө салган айрым мыйзамдарды "Кыргыз Республикасынын мамлекеттик тили жөнүндө" конституциялык мыйзамга шайкеш келтирүү максатында иштелип чыккан.
Документтеги урунтуу учурлар:
депутаттыкка талапкерлер, прокурорлор, өкмөт мүчөлөрү, маморган жетекчилери, судьялар, Улуттук банктын кызматкерлери минкаб аныктаган деңгээлде кыргыз тилин билүүгө милдеттүү;
сот процесстери мамлекеттик тилде жүргүзүлүшү керек, бирок расмий тилди да колдонсо болот;
бала бакчаларда, мектептерде, ЖОЖдордо кыргыз тили окутуунун жана тарбиялоонун негизги тили болушу керек. Мектептерге кыргыз тилинен жазуу, ошондой эле оозеки түрүндөгү көчүрүүчү жана бүтүрүү экзамендерин киргизүү пландалууда;
жарнаманын мамлекеттик тилдеги тексти мыйзам талаптарына жана орфографиялык эрежелерге ылайык келиши үчүн жергиликтүү орган менен макулдашылышы зарыл;
керектөөчүлөрдү тейлөө чөйрөсүндө аудиовизуалдык, музыкалык жана башка программалардын 60 пайызы мамлекеттик тилде болушу шарт;
көпчүлүккө айтылган бардык маалымат (кулактандыруу, жарыя, көрнөк) алгач мамлекеттик тилде, андан кийин расмий тилде жазылышы кажет.
