АКШда Харрис, Клинтон жана Байдендин үй-бүлөсү купуя маалыматсыз калды
18:33 22.03.2025 (Жаңыртылды: 11:15 23.03.2025)
© AP Photo / Yuki Iwamura
Жазылуу
БИШКЕК, 22-мар. — Sputnik. АКШ президенти Дональд Трамп жаңы тескемеси менен Камала Харрис, Хиллари Клинтон жана Жозеф Байдендин үй-бүлө мүчөлөрүнүн жашыруун маалыматтарга жетүү мүмкүнчүлүгүн жокко чыгарды. Бул тууралуу РИА Новости жазды.
Маалыматка ылайык, Трамптын администрациясы жашыруун маалыматка жетүү улуттук кызыкчылыктарга жооп бербей калды деген тыянакка келген.
"Чектөө Энтони Блинкен, Жейкоб Салливан, Лиза Монако, Марк Заид, Норман Эйзен, Летиция Жеймс, Элвин Брэгг, Эндрю Вайсман, Хиллари Клинтон, Элизабет Чейни, Камала Харрис, Адам Кинзингер, Фиона Хилл, Александр Виндман, Жозеф Р. Байден-кичүүсү жана анын үй-бүлө мүчөлөрүнө тиешелүү", – деп айтылат Ак үйдүн билдирүүсүндө.
Ошондой эле аткаруучу бийликтин бардык департаменттерине жана агенттиктерине бул адамдардын өкмөттүк объектилерге коштоосуз кирүүсүнө тыюу салуу тапшырылды. Чектөө жашыруун брифингдерге, анын ичинде "президенттин күнүмдүк маалымдамасына" жана АКШнын Чалгындоо кызматынын мамлекеттик сырларын камтыган маалыматтарына да тиешелүү болот.
Март айынын башында АКШнын Улуттук чалгындоо кызматынын жетекчиси Тулси Габбард Трамптын буйругу менен мурдагы мамлекеттик катчы Энтони Блинкендин жана мурдагы улуттук коопсуздук кеңешчиси Жейк Салливанын жашыруун маалыматтарды көрүп, окуп туруу укугун жокко чыгарганын билдирген.
Ушул жумада Трамп экс-президент Байдендин балдарынын мамлекеттик коргоосун да кайтарып алды.
