Мамытов: ЕАЭБ — кошуналар менен мамилени чыңдай турган мыкты курал
© Sputnik / Асель Акмат
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов ЕАЭБ 10 жылда өзүн тез өнүгүп бара жаткан экономикалык уюм катары көрсөтө алганын айтты.
ЕАЭБ өлкөлөрүнүн соода жүгүртүүсү 7,5 триллион рублге жетти. Бул абдан чоң көрсөткүч. Мындай бааны Улукман Мамытов Sputnik Кыргызстан радиосуна маек куруп жатып берди.
Анын айтымында, кошуна мамлекеттер менен алаканы чыңдоодо экономика жакшы курал болуп бере алат жана ЕАЭБ уюму өзүнүн бул милдетин мыкты аткарууда.
"ЕАЭБ өлкөлөрүнүн ортосундагы соода жүгүртүүнүн көлөмү 7,5 триллион рублге жетти. Бул — биримдик ишин жаңы баштаган учурдан эки эсе көп сумма. Мындай көрсөткүч уюмга мүчө мамлекеттердин экономикасы ушул жылдар аралыгында эки эсеге өстү дегенди билдирет. 10 жылдын өлчөмү менен алып карасак, абдан чоң жетишкендик. Анын үстүнө ЕАЭБ дароо эле түзүлө калбай, башында Бажы биримдиги болуп өткөн эволюциялык баскычтарын да ушул 10 жылга камтып кетүүдө. Негизинен уюм алкагында аткарылган иштер ого эле көп. Ишкериликке түзүлгөн шарттар, эмгек мигранттарына ыңгайлуулуктар, товар ташуудагы жеңилдиктер, айтор, санай берсе көбөйүп кетет. Бирок ЕАЭБге мүчө мамлекеттер ортосунда өндүрүш, ишкерлик үчүн түзүлгөн айрым мүмкүнчүлүктөрдү бардык эле мамлекеттер жакшы колдоно албай жатышат. Мисалы, уюмга мүчө эки же үч мамлекет биригип аччу ишканалар багытында кемчиликтер бар. Ага чоң каражат бөлүнүп жатса да эмнегедир ушул тармак колго алына элек. Буга киришүү үчүн, мисалы, Кыргызстан өзүнүн майда өндүрүштөрүн кооперативдерге бириктирип, анан аттанышы керек. Ушундай ички маселелерди чечип алып, өлкөлөр диалогго барса, уюм алкагында, мамлекеттер ортосунда чоң ишканалар ачылса ЕАЭБ дүркүрөп өсөт", — деди Мамытов.
Экономист ЕАЭБге 10 жыл толгону менен бул тарыхый жактан алып караганда аз убакыт болорун кошумчалады.
