ӨКМ өрт коопсуздугун бузгандарга миллион сомго чейин айып салууну сунуштады
© Sputnik / Евгения Новоженина
/ Жазылуу
Айыптын өлчөмүн төрт эсе жогорулатуу, ири соода объектилери үчүн коопсуздукту камсыз кылуу чараларын күчөтүү аркылуу мыйзамдарды эл аралык талаптарга шайкеш келтирүү максаты коюлган.
БИШКЕК, 26-окт. — Sputnik. Өрт коопсуздугун бузгандарга миллион сомго чейин айып салуу сунушталууда. Тиешелүү мыйзам долбоорун ӨКМ даярдап, документ Жогорку Кеңешке келип түштү.
Андагы сунуштар өрт коопсуздугунун талаптарын бузгандыгы үчүн жоопкерчиликти күчөтүүгө багытталган.
"2007-2022-жылдары өлкөдө 62 миң 276 өрт катталып, андан 1 112 адам каза болуп, 11 миллиард 750 миллион сомдон ашык материалдык чыгым келтирилгени айтылган. Жыл сайын орто эсеп менен 4000ден 6000ге чейин өрт чыгып, 50дөн ашык адам каза болуп, 100дөн ашык адам ар кандай деңгээлдеги жаракат алып, 1 миллиард сомдон ашык зыянга учуратат", — деп жазылган негиздемеде.
Мындан улам айыптын өлчөмүн төрт эсе жогорулатуу, ири соода объектилери үчүн коопсуздукту камсыз кылуу чараларын күчөтүү арыклуу мыйзамдарды эл аралык талаптарга шайкеш келтирүү максаты коюлганы айтылган.
Мыйзам долбоорунда төмөнкүдөй айыптар каралган:
ширетүүчү, битум, электр жана башка өрт чыгуу коркунучу бар жумуштарды жүргүзүүдө коопсуздук эрежелерин бузган жеке жактарга — 7,5 миң сом, юридикалык жактарга — 23 миң сом.
эгерде жосун өрт коркунучу бар жана жарылуучу объектилерде болсо — 23 миң/100 миң сом;
колго жасалган электр приборлорун колдонуу — 1000/7,5 миң сом;
эрежелерди бузуудан адам өмүрүнө жана ден соолугуна залал келген өрт чыкса — 13 миң/75 миң сом.
соода объектилеринде (500дөн ашык соода түйүнү бар), көңүл ачуучу жайлар (500дөн ашык адам үчүн) жана эл көп топтолгон жерлерде өрт коопсуздугунун эрежелерин бузуу — 200 миң сом. Айыптар соода түйүндүн санына жана объектинин сыйымдуулугуна жараша 500 миң/1 миллион сомго чейин жетиши ыктымал.
