Мишустин: ЕАЭБ интеграциялык долбоор катары ийгиликтүү болгонун көрсөттү
© Sputnik / Дмитрий Астахов
/ Жазылуу
БИШКЕК, 1-окт. — Sputnik. ЕАЭБ он жылдык тарыхында интеграциялык долбоор катары ийгиликтүү калыптанды жана эл аралык аренада барган сайын таанымал болуп бара жатат. Бул туурасында Евразия экономикалык форумунун санариптик өнүгүүгө арналган пленардык жыйынында Россиянын өкмөт башчысы Михаил Мишустин айтты.
Форум Ереванда (Армения) өтүп жатат.
Мишустиндин айткандарынын урунттуу учурлары:
Евразия экономикалык биримдигинде түзүлгөн кызматташтык модели товарлардын, кызмат көрсөтүүлөрдүн, капиталдын жана жумушчу күчтүн (иштегендердин) ээн-эркин ары-бери катташын мамлекеттик деңгээлде камсыздайт. ЕАЭБге мүчө өлкөлөрдүн экономикасынын өсүү темпи дүйнөлүк орточо көрсөткүчтөрдөн жогору. Биримдик эл аралык аренада барган сайын таанылып жатат;
Россиянын президенти Владимир Путин ЕАЭБ калыптанып келе жаткан көп уюлдуу дүйнөнүн күчтүү жана өзүн-өзү камсыздай алган уюлдарынын бирине айлануу мүмкүнчүлүгүнө ээ экенин белгилеген. Бул максатка жетүү биримдиктин дараметин ишке ашырууга, анын ичинде бирдиктүү санариптик мейкиндикти түзүүгө байланыштуу. Заманбап технологияларды биримдикке мүчө өлкөлөрдүн экономикасынын бардык негизги тармактарына жана кызматташтык чөйрөсүнө киргизишине жараша болмокчу;
биримдиккке кирген өлкөлөрдүн мекемелеринин ортосунда маалыматтарды жана электрондук документтерди ишенимдүү өткөрүүнү камсыздоо үчүн бирдиктүү маалыматтык платформа өнүгүүдө, келечекте ага башка кызыкдар өлкөлөр да кошулушу мүмкүн;
технологиялык көз карандысыздыкты камсыздоо маанилүү милдет бойдон калууда. Бул үчүн технологиялардын экономикага, социалдык чөйрөгө жана мамлекеттик башкарууга тереңдеп киришин ыкчамдатуу керек. Бул системалуу маселелерди ар ким өзү иштеп чыккандарына таянып, биргелешкен аракеттер менен чечүүгө болот.
