"Социалдык контракт" долбооруна катышчулардан арыз кабыл алына баштады
© Sputnik / Асылбек Бактыбеков
Жазылуу
Сокулук райондук Эмгек, социалдык камсыздоо башкармалыгынын калкты иш менен камсыздоого көмөктөшүү бөлүмүнүн башчысы Мээрим Молдокулова "Социалдык контракт" долбоорунун катышуучуларынын 85 пайызын аялдар түзөрүн айтты.
"Социалдык контракт" долбоорунун негизги максаты 16 жашка чейинки балдары бар, аз камсыз болгон үй-бүлөлөрдү жакырчылыктан чыгаруу болуп эсептелет. Аталган долбоор ишке кирген 2022-жылы — 50, 2023-жылы 200 үй-бүлөгө берилген. Бул тууралуу Мээрим Молдокулова Sputnik Кыргызстан радиосуна маек куруп жатып билдирди.
"Социалдык контракт" долбооруна катышчулардан арыз кабыл алына баштады
Анын айтымында, аталган долбоорго катышуу үчүн жөлөк пул алган үй-бүлөлөр эки жылдык бизнес-план түзүп келиши шарт.
"Социалдык контракт" долбооруна катышууну каалагандар жөлөк пул алып жүргөн үй-бүлөлөрдөн болушу шарт. Алар бизге документ тапшырарда берилген каражатты кайсы тармакка иштетерин көрсөткөн эки жылдык бизнес-план түзүп келиши керек. 2022-2023-жылдарда жалпысынан 250 үй-бүлө аталган долбоорго катышса, алардын ичинен 142си мал багуу боюнча, тигүүчүлүккө — 72, соода-сатыкка иштетем деп — 21, жер иштетүү — эки, устачылык — бирөө, бут кийим тигүү — үч, кондитердик азыктар — бир, тоок ферма — эки, күнөскана — бир, такси кызматы боюнча беш кайрылуу түшүп, учурда бардыгы ийгиликтүү иштеп жатышат. Бул үй-бүлөлөр аз камсыз болгон жакыр үй-бүлө статусунан чыгып, ошону менен катар жумушсуздук боюнча турган тизмесинен да чыгып жеке ишкер катары катталып калышты. Ал эми 2024-жылкы долбоорго катышууну каалаган үй-бүлөлөргө деле талап жогорудагыдай. Алар социалдык контракт алыш үчүн эмне документтер керек, кирешелүү багытты кантип тандап, адашпай ишти алып кетүү үчүн кандай кадамдар маанилүү болот деген суроолор менен көп кайрылышат. Биз бул багытта жакында атайын окутууларды уюштурабыз. Социалдык контракт алууну каалаган жана статусу туура келген үй-бүлөлөр жашаган жери боюнча айылдык жана шаардык бийликке кайрылышса болот. Биздин районго быйылкы жылдын эсебинен 125 квота бөлүндү. Учурда айыл өкмөттөргө 73 арыз келип түштү. Долбоорго катышкан үй-бүлөлөр активди алган соң биздин кызматкерлер керек-жарагын сатып алганда чогуу жүрөт. Мындан соң ай сайын үч ай катары менен мониторинг жүргүзүлүп турат. Анан квартал сайын, бир жылдан соң жарым жыл сайын мониторинг жасалып турат. "Социалдык контракт" долбооруна көбүнчө аялдар катышып, жалпы көрсөткүчү 85 пайызды түздү, ал эми эркектер 15 пайызга жетти", — деди Молдокулова.
Ал "Социалдык контракт" долбоору катышуучуларды өз алдынчалуулукка тарбиялап жатканын кошумчалады.
