Абазбек уулу: келечекте 5 ЖОЖдон башкасына да атайын статус берилет
© Sputnik / Асель Сыдыкова
Жазылуу
Билим берүү жана илим министринин орун басары Расул Абазбек уулу өзгөчө статус ыйгарылган беш ЖОЖдун мугалимдерине айлык маянаны министрлик эмес, университеттер өздөрү бекитерин айтты.
Коомчулукта жогорку окуу жайларына ыйгарылган өзгөчө статус эмнеге бешөөнө гана берилди деген суроолор болуп жатат. Алгач мындай эркиндикти ушул ЖОЖдордун алкагында ишке ашырып көрөлү дедик. Бул биринчи кезекте жоопкерчилик. Аталган окуу жайлар ыйгарылган статусту туура колдонуп кете алышса, келечекте башка ЖОЖдорго да берилет. Бул тууралуу Расул Абазбек уулу Sputnik Кыргызстан радиосуна маек куруп жатып билдирди.
Абазбек уулу: келечекте 5 ЖОЖдон башкасына да атайын статус берилет
Анын айтымында, ЖОЖдорго ыйгарылган өзгөчө статус административдик, каржылык жана академиялык эркиндикти камтыйт.
"Жусуп Баласагын атындагы Кыргыз улуттук университетине, Исхак Раззаков атындагы Кыргыз мамлекеттик техникалык университетине, Константин Скрябин атындагы Кыргыз улуттук агрардык университетине, Иса Ахунбаев атындагы Кыргыз мамлекеттик медициналык академиясына жана Ош мамлекеттик университетине өзгөчө статус ыйгардык. Бул берилген эркиндиктин жоопкерчилиги да бар. Аталган окуу жайлар эми административдик жана каржылык мүмкүнчүлүктөрүнүн кеңейгендигинен пайдаланып, окуу базасын жакшыртып, университеттердеги коррупциянын жоюлушун шарттап жана билим сапатын арттырган чечкиндүү кадамдарды жасашы керек. Алар жакшы жыйынтыктарды көрсөтсө республикадагы башка ЖОЖдор да ушундай статуска ээ болушат. Аталган беш окуу жай эми штаттык, каржылык маселелерин өзү чечип, башкысы академиялык да эркин иш жүргүзө алат. Мугалимдерине айлык маянаны бекитүү ЖОЖдун администрациясына жүктөлөт. Андыктан бул окуу жайларды учурда чоң жоопкерчилик күтүп турат", — деди Абазбек уулу.
Ал кайра түзүлүүнүн жыйынтыгы менен мамлекеттик ЖОЖдордун саны 33төн 28ге кыскарганын кошумчалады.
