Адис пиротехникалык каражаттарды коопсуз колдонуу эрежелерин санап берди
© Sputnik / Асель Сыдыкова
Жазылуу
Пиротехникалык ишкананын кызматкери Аскар Сабырбек уулу майрамдарда аттырылуучу заттарды сатып алуу жана аларды коопсуз колдонуу эрежелери тууралуу айтып берди.
Эгерде сиз сатып алган пиротехникалык каражат иштебей калса же таңгагында көрсөтүлгөн санда салют атылбаса, анда ага 10-15 мүнөт жакындабаңыз. Андан кийин ага суу куюп, көрсөтмөгө ылайык, андан ары тутанып кетпеши үчүн 24 саат бою суу куюлган идишке салып коюу керек. Бул тууралуу Аскар Сабырбек уулу Sputnik Кыргызстан радиосунда маек куруп жатып билдирди.
Адис пиротехникалык каражаттарды коопсуз колдонуу эрежелерин санап берди
Анын айтымында, пиротехникалык каражатты балкондон чыгып алып же терезеден аттырууга болбойт.
"Пиротехникалык каражаттарды сатып алууда продукциянын заводдо жасалганын текшериш керек. Аны товардагы QR-код аркылуу билсе болот. Сатып алынган продукциянын уруксат сертификаттары, колдонуу боюнча нускамалары бар-жоктугуна өзгөчө көңүл буруу зарыл. Алар каражаттын сыртында жазылууга тийиш. Мындай каражаттарды колдонууда жаракат албоо үчүн инструкцияны так аткаруу керек, анда тигил же бул продукцияны колдонууга уруксат берилген адамдардын жаш критерийи да көрсөтүлөт. Ал эми чоң майрамдык фейерверк уюштуруу үчүн, адистерге кайрылган жакшы. Пиротехникалык каражаттардын сактоо мөөнөтүнө көңүл буруу да өтө маанилүү. Фейерверк, салют аттыруу үчүн кенен, ачык аянт тандаңыз. Ал жерге жакын 100 метр аралыкта өрттөнүп кетүү коркунучу бар объектилер, автоунаа болбошу керек. Көрүүчүлөр аянтчадан 35-50 метр аралыкта турушу зарыл. Ошондой эле турак жайлардын жанында пиротехникалык каражаттарды колдонууга катуу тыюу салынат. Аталган зат терезеден үйгө кирип, балконго же чатырга түшүшү мүмкүн. Аталган каражаттарды жабык бөлмөлөрдө, батирлерде, кеңселерде, эл көп чогулган жерлерде колдонууга болбойт", — деди Сабырбек уулу.
Ал пиротехникалык каражатты жылытуу приборлорунун жана ачык оттун жанында, күн тийген жерде сактоого, отко жагууга, адамдарга жана жаныбарларды көздөй атууга, чоңдордун катышуусу жок балдардын колдонуусуна жана мас болуп атууга тыюу салынарын кошумчалады.
Эске сала кетсек, быйыл Жаңы жылдын түнүндө Бишкектеги борбордук "Ала-Тоо" аянтында майрамдык салют атылбайт. Муниципалитет баш калаадагы экология менен коопсуздукту сактоо максатында элден петардаларды сатып албоо жана жаңы жылдык майрамдоо учурунда колго жасалган фейерверктерди колдонбоону өтүнгөн.
