Усубалиев: Орто Азия боюнча кыргыз сүрөтчүлөрүнүн деңгээли жогору
11:37 12.12.2021 (Жаңыртылды: 14:27 14.12.2021)
© Sputnik / Асель Сыдыкова
Жазылуу
Кыргызстан сүрөтчүлөр союзунун төрагасы, Кыргыз эл сүрөтчүсү Таалайбек Усубалиев пандемия башталгандан бери онлайн сүрөт көргөзмөлөр актуалдуу болуп жатканын айтты.
СССР учурунда Сүрөтчүлөр союзу мамлекеттик буюртмаларды аткарып, жумуштар өкмөт тарабынан каржыланып, иш быкылдап турчу. Башка чет мамлекеттерге чыкпаганыбыз менен Советтер Союзунун 15 мамлекетин кыдырып, өтө чоң көргөзмөлөр уюштурулчу. Ал учурда мекеме өкмөткө карап, төрагасын шайлоого жогорку бийлик да катышчу. Бул тууралуу Таалайбек Усубалиев Sputnik Кыргызстан радиосунун эфиринде маек куруп жатып билдирди.
Усубалиев: Орто Азия боюнча кыргыз сүрөтчүлөрүнүн деңгээли жогору
Анын айтымында, Кыргыз сүрөтчүлөр союзу Россия, Кытай мамлекеттеринин союздары менен тыгыз иштешет.
"Учурда Сүрөтчүлөр союзу көз карандысыз мекеме. Өз алдынча күнүн көрүп жатат. Чачырап кетпей союз учурундагы бизге тиешелүү мекемелерди сактап калганыбыз чоң утуш болду. Кыргыз сүрөтчүлөрү чет мамлекеттерде көргөзмөлөрдү өткөрүп, өлкөнү таанытып, ар кандай сыйлыктарды алып келип жатат. Орто Азия боюнча кыргыз сүрөтчүлөрүнүн деңгээли жогору экенин белгилеп кетким келет. Союз мезгилинде кыргыз сүрөтчүлөрүнүн училищеси гана болсо, Казакстан, Өзбекстандын сүрөт институту болгон. Ал эми тажикстандыктар, түркмөнстандыктар мурдатан эле сүрөткө анча жок болчу. Биздин өнөрпоздор жогорку билимди Москва, Санкт-Петербургдан алгандыктан күчтүү сүрөтчүлөр чыкты. Азыр ошол билимдүү адистер Тургунбай Садыков атындагы Улуттук сүрөт академиясында кийинки өнөр ээлерин окутуп жатышат. Акыркы ирет Кыргыз улуттук көркөм сүрөт искусство музейинде Кыргызстандын эгемендүүлүгүнүн 30 жылдыгына карата республикалык көргөзмө өткөрдүк. Анда коюлган картиналар арасында сынак уюштурулуп, комиссия жеңүүчүсүн аныктап, акчалай сыйлык тапшырылды. Иш-чарага сүрөтчүлөр фонду каражат бөлдү", — деди Усубалиев.
Ал азыр сүрөтчүлөр эл аралык конкурстарга онлайн катышып жатканын, айрымдарына каражаттын жоктугунан бара албай калып жатышканын кошумчалады.
