Белгилүү кинорежиссер Геннадий Базаров 1977-жылы "Каныбек" тасмасын тартууга киришет. Анын оператору Мурат Жыргалбаев, композитору Калый Молдобасанов болсо, фильмдин сценарийин Базаров менен Кадыркул Өмүркулов экөөлөп жазган.
Белгилүү жазуучу Касымалы Жантөшевдин тарыхый романынын негизинде тартылган эмгекте XIX кылымдагы кыргыз элинин турмушу, социалдык жашоосу көрсөтүлөт.
Ал кезеңди КРдин эл артисти, кинорежиссер Геннадий Базаров мындайча эскерет:
"Каныбекти" баштаганда алгач эки серия кылып тартуу пландалып, бардык маселелер макулдашылган. Ишти 1977-жылы баштап, 1978-жылы толугу менен бүткөнбүз. Актердук курам абдан күчтүү эле. Оштогу өзбек театрынын актерлору да чакырылган. Бирок кийин акча жок деп бизди ыңгайсыз абалга таштап, ишибиз башаламан болуп, экинчи сериясы тартылбай калды. Мен көп кызыктуу эпизоддорду фильмдин экинчи бөлүгүнө калтырып койгон элем. Ошентип ал кинокартина өтөсүнө чыкпай, чыгармадагы баян толук экрандаштырылбай калган. Убакыт өткөн соң баштаган ишибиз эмнеге соңуна чыкпай калганын билип калдым. Кыскасы, атайын бут тосуп коюшуптур, кимдер кылгандыгын азыр айтуунун зарылчылыгы деле жок. Жаш болчубуз, массовкага эле миңдей адам катышкан. Көрүүчүлөргө сунушталганда мактагандар да, сындагандар дагы болгон", — деди Базаров.
Кинокартинанын басымдуу бөлүгү Чоң Кемин, Алай жана Кочкор райондорунда тартылып, анда Сабира Күмүшалиева, Алиман Жангорозова, Бакен Кыдыкеева, Насыр Кытаев, Турсун Уралиев, Асанкул Куттубаев, Советбек Жумадылов, Сүймөнкул Чокморов, Чоро Думанаев, Мария Кутманалиева, Жекшенаалы Арсыгулов, Аман Камчыбеков, Дүйшөн Байдөбөтов жана Оштогу өзбек театрынын актерлору катышкан.
