"Психолог менен баарлашуу" рубрикасына кайын журту менен мамилеси келишпей, жолдошу менен урушуп жүргөн келин кат жазган.
Саламатсыздарбы, менин турмушка чыкканыма беш жыл болду. Кайын журтум менен мамилем көп жакшы эмес, эмнегедир башынан эле жылдызыбыз келишпей калды. Ошондуктан сыйыраак бололу деп көп жолукпаганга аракет кылам. Жолдошум аларга болгон мамилемди билсе дагы туугандарын конокко тез-тез чакыра берет. Өзгөчө кайненем көп келет. Бир жагынан өзүбүздүн үйүбүз жок, акы төлөп батирде турабыз. Жолдошум жакшы акча табат. Ал бизди да багат, ата-энесине да жардамдашат. Жакында жер тилке сатып алып, там салганы жатабыз. Бирок үй саларыбыз менен эле кайнатам менен кайненем биротоло биздикинде жашачудай болуп турат. Алар келсе калган кайындарыма да кудай берет. Тапырап биздикинен эле чыкпай калышарын сезип турам. Ушул жагын ойлоп да тынчсызданам.
Жакында үчүнчү балам төрөлөт. Ооба, бул жолкусунда сактанып деле турсам болмок. Бирок эми болор иш болду. Ажырашып кетейин десем да азыр каржы жагынан күйөөмө көз карандымын.
Жакында эле жолдошум жеңил жүрүм-турумдагы кыздардын сайтына киргенин билип калып катуу урушканбыз. Бул тууралуу дурустап сүйлөшүп, элдеше электе эле бир туугандарынын балдарын жайкы каникулга чакырып алды. Эми аларга акчасын коротуп жүрөт.
Ушунчалык зыкым адаммынбы же менин пикирим ага баары бирби, түшүнбөй койдум. Акчаны туугандарына короткону мага жакпасын эң сонун билсе да ата-энесине, туугандарына чача берет. Ушул үчүн үйдө көп уруш болот. Айтсам "өзүм тапкан акчамды өзүм билем" деп коёт. "Мени түшүнбөгөн адам менен жашап эмне кереги бар" деп көп ойлончу болдум. Азыр убактылуу иштебегеним менен мен деле үйдө жөн отурган жокмун да. Балдарды карап, үйдө болууга туура келип жатпайбы...
Психолог Гүлнара Жасоолова:
— Бул келиндин көйгөйү экономикалык жагдайга байланыштуу экен. Акча жагынан көз каранды кылуу да үй-бүлөлүк зомбулуктун бирине кирет. Ушундан улам келинде кайын журтуна болгон каржылык кызгануу жаралууда. Мунун бардыгы жубайлардын ортосундагы бири-бирине болгон ишеничтин жоктугунан келип чыгат. Калган майда-барат келишпестиктердин баары ушуга байланыштуу десек болот.
Жолдошуңуздун кыз-келиндер сайтына киргенин жазыптырсыз, ал да ошол ортодогу ишенимдин жоктугунан улам болууда. Акча маселесин жөнгө салып, мамилени бир беткей чечип албасаңыздар мындай майда-чүйдө көйгөйлөр чыга берет. Ага дайыма айланасындагы адамдар, кайын журт себепчи болуп калат.
Адам канчалык негативдүү ойлорду ойлоно берсе, ал кайталана берет. Салына элек үйгө эле баары кирип алышпайбы деп кооптоно берүү туура эмес. Бул психосоматика деп аталат. Каттын ээсине жакшы психологдорго барууну сунуштар элем.
Анан дагы ажырашууну эмес, жолдошуңуздун жакшы жактарын жана үй-бүлөсүн эч кем кылбай багып жаткандыгын ойлоңуз. Ал сөзсүз түрдө үй-бүлөлүк маанайга жакшы таасир этет.
Кыргыздар негизинен тууганчыл келебиз. Менталитетибиз ошондой, жакындарыбызды да жашообуздан чийип сала албайбыз. Бул жагын да эске алып, күйөөңүз менен жай отуруп сүйлөшүп алууга кеңеш берер элем.
