БИШКЕК, 16-авг. — Sputnik. Москва "Талибан"* кыймылы (Кыргызстанда террордук уюм катары таанылып, ишмердүүлүгүнө тыюу салынган) Россиянын Борбор Азиядагы союздаштарына коркунуч жарата турган бир дагы фактыны байкаган жок. Бул тууралуу РИА Новости РФ президентинин Афганистан боюнча атайын өкүлү, ТИМдин Азияны караган экинчи департаментинин башчысы Замир Кабулов билдиргенин жазды.
Ал талибдер өздөрү дагы Афганистандын сыртына чыгуу максаты жок экенин айтканын белгилеген.
"Талибдер башка аймактарга өтүү максаты жок экенин бир нече жолу тастыктады. Алар 2000-жылы сабак алышкан. Андыктан Борбор Азиядагы биздин союздаштардын коопсуздугуна түздөн-түз коркунуч жаралары тууралуу бир дагы фактыны көргөн жокпуз", — деди Кабулов.
"Мындай башаламан кырдаал менен бийлик алмашып жатканда ар дайым башка эл аралык террордук уюмдарга жан кире баштайт. Алар кийинчерээк биздин союздаштардын коопсуздугуна коркунуч жаратышы мүмкүн", — деди Кабулов.
Анын айтымында, Россия эбак эле Афганистандын жаңы бийлиги менен сүйлөшүү үчүн негиз даярдап койгон.
