БИШКЕК, 7-авг. — Sputnik. Кыргызстандык мушкер, кикбоксинг боюнча дүйнө чемпиону Дастан Шаршеев OPEN FC лигасынын Бишкекте өтүүчү мелдешинде октагонго чыгат. Бул тууралуу мелдешти уюштуруудагы өнөктөш "Батырбашы" мушкерлер уюмунун негиздөөчүсү Дамир Батырбашиев билдирди.
OPEN Fighting Championship 8 мелдеши 14-августта Бишкектеги Дөлөн Өмүрзаков атындагы борбордук стадиондо саат 18:00дө башталат.
Уюмдун алгачкы гран-при мелдешинин финалына кыргызстандык мушкер Алимардан Абдыкааров чыгат. Ага армениялык Айк Казарян атаандаш болот.
Турнирде ошондой эле, лиганын жарым жеңил салмак категориясындагы кыргыз мушкери Бакытбек Дүйшөбеков менен бразилиялык Бруно Роверстин чемпиондук наам үчүн таймашы болот.
Спорттук ири иш-чараны Бишкекте өткөрүү чечимин промоушендин жетекчилиги кыргызстандык мушкердин гран-при мелдешинин финалына чыкканы үчүн кабыл алган.
