БИШКЕК, 7-авг. — Sputnik. Бала канча жашынан тарта жоопкерчиликти сезет жана аны тартип менен тазалыкка кантип үйрөтүү керек. Бул тууралуу РИА Новости агенттигине Россиянын билим берүү академиясынын Баланы, тарбияны жана үй-бүлөнү изилдөө институтунун директору Наталья Агре айтып берди.
Адистин пикиринде, бала 3-3,5 жашынан тарта өзүнүн аракеттеринин натыйжасы же кесепети кандай болорун түшүнө баштайт. Бирок муну толук кандуу жоопкерчилик деп айтууга болбойт.
"Кандай болгон күндө дагы балага кичине кезинен баштап өз алдынча чечим кабыл алууга же өз катасын оңдоого мүмкүнчүлүк берүү керек. Мисалы, бала жаңыдан бутуна тура баштаганда кайра-кайра жыгыла берет эмеспи. Бул учурда коопсуздугу үчүн алдына жумшагыраак бир нерсе төшөп койсо болот. Бирок жыгылбасын деп ар кайсы жагынан жөлөп-таеонун кереги жок. Анткени бул нерсе мүнөз менен чогуу калыптанат. Кийин дагы бирөөдөн ошондой колдоо күтүп, өмүр бою ата-энесине көз каранды болуп жашайт", — деди адис.
"Жумуш кылууга үйрөтүүнүн эң жакшы жолу — сүйлөшүү, компромисске баруу. Мисалы, балдардын өткөөл курагы болот. Бул учурда оюндагысын бергиси келбейт. Андан тышкары, чейрек чыгар алдында, экзамен учурунда окуучу стрессте жүрөт. Мындай мезгилде бөлмөңдү жыйна эле жыйна деп уруша бербей, сүйлөшүп түшүндүрүү керек", — деди Агре.
Ошондой эле ал баланы эмгекке үйрөтүү үчүн үйдөгү жумуштарды бөлүшүп алуу, расписание түзүп алуу дагы пайдалуу экенин кошумчалады.
