БИШКЕК, 3-авг. – Sputnik. Айсулуу Тыныбекова Олимпиада-2020 мелдешинин алтын байгеси үчүн япониялык балбан кыз Юкако Каваи менен күрөшөт.
Каваи 24 жашта. 2014-жылы өспүрүмдөр арасындагы дүйнө чемпионатында коло медалга ээ болгон. 2018-жылкы дүйнө биринчилигинде күмүш байгени алган.
Мындан эки жыл мурда Нур-Султан шаарында өткөн дүйнө чемпионатында коло медалга ээ болуп, Олимпиадага жолдомо колуна тийген.
Бириккен күрөш дүйнөсү (UWW) уюмунун рейтингинде 62 килограмм салмактагы балбан кыздардын арасында Айсулуу биринчи орунда болсо, Юкако төртүнчүдө турат.
Айсулуу Тыныбекова бүгүн жарым финалда украиналык Ирина Коляденкону утуп алды.
Ага чейин чейрек финалда румыниялык Кристина Инченин далысын тийгизип, таза жеңишти камсыздаган. Ал эми баштапкы этапта латвиялык Анастасия Григорьева менен кармашып 8:0 эсебинде утуп алган.
Атаандаштар алтын үчүн эртең, 4-август күнү, беттешет.
