Бактыгулов: Россия Борбор Азияда тынчтык болушуна кызыкдар
13:07 15.06.2021 (Жаңыртылды: 22:31 16.12.2021)
© Sputnik / Эркин Садыков
Жазылуу
"Пикир" регионалдык эксперттер клубунун тең төрагасы, саясат таануучу Шерадил Бактыгулов Россия Кыргызстанга алты ай сайын финансылык көмөк көрсөтүп турарын белгиледи.
Борбор Азияда террордук коркунуч жаралса Россия жардамдашат. Себеби алар деле аталган аймакта тынчтык болушуна кызыкдар. Мындай пикирин Шерадил Бактыгулов Sputnik Кыргызстан радиосунда маек куруп жатып билдирди.
Бактыгулов: Россия Борбор Азияда тынчтык болушуна кызыкдар
Анын айтымында, коомчулуктун айрым бөлүгү "эки өлкөнүн мамилеси сууп кетти" деген божомолу таарынычтан улам айтылууда.
"Кыргыз-тажик кандуу жаңжалынан улам коомдун айрым бөлүгүндө Россия менен Кыргызстандын мамилеси муздап калды деген божомолдор айтылууда. Чынында буга негиз жок. Себеби кыргыз-тажик жетекчилери Россиядан жаңжалды токтотууга көмөк сураса, бермек. Бирок кыргыз-тажик президенттери кандуу кагылышты эки тараптуу сүйлөшүүлөрдүн негизинде чече турганын билдирди. Мындан улам Россия өзүн нейтралдуу кармады. Чынында коомчулук Россия болушат, көмөктөшөт деп күтүп жаткан. Ошондуктан кандайдыр бир деңгээлде таарынычтан улам жогорудагыдай сөздөр айтылып жатышы ыктымал. Чынында Россия жардам берип эле келе жатат. Алсак, гуманитардык, аскердик көмөк көрсөтүп, вакцинадан каралашууда. Мындан тышкары, Россия тарабынан кыргыз бюджетине алты ай сайын каражат бөлүнөт. Анын ичинен социалдык төлөмдөр төлөнүүдө. Ошондуктан кандай жардам берилиши керектиги аныкталышы зарыл. Маселен, кыргыз мигранттары Россияда ээн-эркин иштеп жатат. Мындай жеңилдиктер башка өлкөлөргө берилген жок. Эки өлкө өнөктөштүк, шериктештик негизде кызматташууда. Алар Борбордук Азияда тынчтык болушуна кызыкдар. Учурда Афганистандын аймагында террордук топтор бар экени айтылууда. Алар коркунуч жаратып, күчүбүз жетпей калса Россияга кайрылабыз. Себеби эки өлкө кызматташат", — деди Бактыгулов.
Ошондой эле ал муктаждык жаралып кыргыз жетекчилиги Россияга кайрылса, алар өз көмөгүн бере турганын кошумчалады.
