Геннадий Базаров 1942-жылы 14-майда Нарын облусунун Ат-Башы айылында туулган. Атасы партиялык кызматкер болгондуктан балалыгы өлкөнүн ар кайсы бөлүгүндө көчүп-конуп өткөн. Окуучу кезинде "Советтик Кыргызстан" киножурналынын операторлорунун иштегенин көрүп кино тармагына кызыгып калат да, өз алдынча фотоаппарат менен иштегенди, сүрөт тартканды үйрөнө баштаган. Мектепти аяктаган соң тасма тартуу жаатында тажрыйбасы жок болгондугуна карабай "Кыргызфильм" киностудиясында эки жылдай иштейт. Ал жакта катардагы жумушчу болуп, оператор Марлес Туратбеков, Кадыржан Кыдыралиевди ээрчип, ассистент кызматын аркалайт. 1961-жылы Москвадагы Герасимов атындагы мамлекеттик кинематография институтуна тапшырып, режиссёр адистигин алган.
Кийинки жылдары "Каныбек", "Жаңылуу", "Буктурма", "Көчө", "Приют для совершеннолетних", "Айың", "Аномалия" өңдүү мыкты тасмаларды жаратат. Сценаристтин кесиптештери менен замандаштары аны мыкты сүрөткер деп эсептешет. Анткени Айтматов атындагы эл аралык сыйлыктын лауреаты өзүнүн эмгектерин башкача көз караш менен карап, окуяны же каарманды ачып берүүдө өзгөчөлөнүп, дайым изденүүнүн үстүндө жүрөт.
СССР кинематографиясынын отличниги өмүрүн киного арнап, жубайы экөө эки кыз, бир уулду тарбиялап өстүргөн.
Көптөгөн мамлекеттик жана эл аралык сыйлыктардын лауреаты, "кыргыз кереметин" жаратуучуларынын көрүнүктүү өкүлү жөнүндө кызыктуу фактыларды Sputnik Кыргызстан агенттигинин материалынан окуңуздар.
