УКМК Жогорку соттун төрайымы Гүлбара Калиевага кылмыш ишин козгоду

БИШКЕК, 26-дек. — Sputnik. Жогорку соттун төрайымы Гүлбара Калиевага карата кылмыш иши козголду. Бул тууралуу УКМКнын маалымат кызматы кабарлады.

Атайын кызмат "Жергиликтүү сот" автоматташтырылган маалыматтык системаны ишке киргизүүдөгү коррупция фактысы боюнча Жогорку соттун кызмат адамдарына карата сотко чейинки өндүрүш ачылганын белгилейт.

"Сотко чейинки териштирүүнүн алкагында бул ишке Жогорку соттун төрайымы Гүлбара Калиева аралашканы туурасында айныгыс далилдер алынды. Буга байланыштуу аны кылмыш жоопкерчилигине тартууга макулдук берүү үчүн Соттор кеңешинин алдындагы Тартип комиссиясына сунуштама киргизүү боюнча Башкы прокуратурага өтүнүч келтирилди. Эгер макулдук берилсе Калиева кылмыш жоопкерчилигине тартылат", — деп айтылат билдирүүдө.

Белгилей кетсек, УКМК төрагасы эки күн мурун маалымат жыйында Жогорку соттун төрайымы жакында кармала турганын айткан.

Ошол эле күнү Жогорку сот "Гүлбара Калиеванын аталган ишке тиешеси жок" деген билдирүү тараткан.

Андан соң Судьялар кеңеши президенттин милдетин аткаруучу Талант Мамытовго ачык кат жолдоп, "соңку окуялар укук коргоо органдарынын жашыруун кысым көрсөтүүсүнүн далили" экенин айтышкан. Ошондой эле күнөөсүздүк презумпциясы кылмыш ишинин негизги принциптеринин бири болуп саналарын эскерткен.

Деген менен УКМК бийликтин бир бутагы болгон Жогорку сот менен Судьялар кеңеши позициясын алдын ала аныктап жана бир жактуу позицияны көрсөтүп жатканына тынчсыздануусун билдирди.

Ошону менен катар Конституцияга ылайык, мыйзам жана сот алдында баары бирдей экенин эске салды.