УКМК төрагасы сотторго катуу тиш кайрап, баасы асман чапчыган автоунааларды жана хан сарайларды кайсы акчасына алганын териштире турганын билдирди.
"Жогорку сотто 35 судья бар экен. Баары Lexus LX570, Mercedes-Benz, Gelandewagen минип жүрүшөт. Эки күн мурда Жогорку соттун бир судьясы үй-бүлөсүн алып Дубайга учуп кетиптир. Бул эмне деген акмакчылык! Кечээ мен ал сотко териштирүүнү дайындадым. Дубайга төрт адамдын эс алып келгенин эсептесек 15-20 миң доллар экен, ал акчаны кайдан алды? Соттун кийген бир шубасы эле 5000, өтүгү 1000 доллар турат. Минген машинасы 100 миң доллар турат, жашаган үйү миллион долларлык. Андан сырткары, шаарда квартираларды алып койгон. Мына, кечээ кармалган сотубуздун 20 квартирасы бар экен. Бул эмне деген акмакчылык!" — деди Ташиев.
Төраганын айтымында, сотторду тартипке келтирмейин коом оңолбойт. Ошондой эле ал аткаминерлерди декларациясына эмнени жазса дал ошондо жашай тургандай кыларын белгиледи.
Мындан сырткары, УКМК төрагасы баалуу мүлктөрүн туугандарына каттатып койгон мамлекеттик кызматкерлер менен Жогорку Кеңештин депутаттарына кайрылып, өз жолу менен жашашы керектигин эскертти.
УКМК төрагасы криминалдык топтордун лидерин ооздуктагандан кийин спортчулардын тобу баш көтөрүп чыкканына токтолду.
"Урматтуу спортчулар, мен сиздерге дагы кайрылам, кандайдыр бир криминалдык иштерге аралашпай, бирөөлөргө басым кылбай, өлкөнүн желегин дүйнөгө желбиретишиңер керек. Эгер мыйзам бузса, спортчу болобу, атактуулугу барбы, бирөөнүн тууганыбы, карап отурбайбыз", — деди Ташиев.
УКМК төрагасынын маалымат жыйынын толугу менен Sputnik Кыргызстан жүргүзгөн түз эфирдин видеосунан көрө аласыздар.
