БИШКЕК, 10-дек. — Sputnik. Өзбекстандын бийлиги пандемияга байланыштуу Кыргызстан менен токтоп калган автобус каттамдарын жандантууну ниеттенип жатат. Бул тууралуу Sputnik Өзбекстан Инвестиция жана тышкы соода министрлигине шилтеме берип жазды.
Маалыматка караганда, автобус рейстерин жандантуу маселеси премьер-министрдин милдетин аткаруучу Артем Новиковдун Ферганага болгон сапарында Өзбекстандын инвестиция жана тышкы соода министри Сардор Умурзаков менен болгон жолугушуусунда талкууланган.
"Тараптар эл аралык автобус каттамдарын жандантуу үчүн биргеликте иш алып барууга даяр экендигин билдиришкен", — деп айтылат маалыматта.
Жолугушуу учурунда Кытай — Кыргызстан — Өзбекстан темир жолун ишке берүү үчүн тыгыз кызматташуу дагы макулдашылган.
Мындан сырткары, жүк ташуучу унаалар Кытайдан Европаны көздөй Борбор Азия аркылуу каттаган, тагыраагы, Анжиян — Ош — Эркеч-Там — Кашкар жолун эффективдүү пайдалануу маселеси дагы көтөрүлгөн.
Өзбекстан менен Кыргызстандын ортосундагы автобус каттамы пандемияга байланыштуу үстүбүздөгү жылдын март айында токтотулган. Ал эми өзбек-кыргыз чек арасынан өтүү режими 1-сентябрда калыбына келсе, авиакаттам 14-сентябрда жанданган болчу.
