БИШКЕК, 4-сен. — Sputnik. Дыйкан айылы менен Кара-Кече кенинин ортосунда убактылуу жол ачылып, көмүр жүктөлүп жатат. Бул тууралуу "Кыргызкөмүр" ишканасынын маалымат кызматы кабарлады.
Ага ылайык, учурда Дыйкан — Кара-Кече жолу убактылуу трасса менен камсыз болуп, көмүргө келчү оор жүк ташуучу унаалар каттай баштады. Ошондой эле электр чубалгылары толугу менен калыбына келтирилип, көмүр кени жарык менен камсыз болду.
Жолду курууга Транспорт жана жолдор министрлиги менен "Кыргызкөмүр" ишканасы тиешелүү техникаларды бөлгөн. Алдыдагы коопсуз жолду салуу боюнча иштер жүргүзүлө турганы айтылды.
Боронов Бишкек ЖЭБдин иши менен таанышып, көмүр келе электигин сындады
Эске сала кетсек, августтун этегинде жааган жаан-чачындан улам Дыйкан — Кара-Кече унаа жолунун тилкесине таш кулап, 300 миң метр куб көлөмүндөгү шиленди пайда болгон. Анын кесепетинен электр түркүктөрү жабыркап, Кара-Кече көмүр кенинин борбордук кен казуучу жериндеги жол жабылган.
Премьер-министр Кубатбек Боронов көмүр кенине барчу жолду кыска мөөнөттө ачууну тапшырган.
