БИШКЕК, 17-июл. — Sputnik. Коронавирустун алгачкы белгилери байкалганда беш күнгө чейин дары-дармек ичүү сунушталбайт. Бул туурасында Саламаттык сактоо министрлигинин штаттан тышкаркы башкы инфекционисти Айнура Кутманова билдирди.
Адис эгерде дене табы 38 градустан ашпай турса, алгачкы беш күндө бир гана суюктукту көп ичүүгө кеңеш берди.
"Оорунун белгилери (дене табынын 38 градуска чейин көтөрүлүшү, тамак оору жана жөтөл, алсыздык) пайда болгондо жарандар активдүү дарыланып башташат. Бул өтө кооптуу. Алгачкы күндөрү организм өзү вирус менен күрөшөт, мындан улам дене табы көтөрүлөт. Демек баштапкы беш күндүн аралыгында өзүн-өзү дарылоо жана дене табын түшүрүү сунушталбайт. Ал эми дене табы 38,5 градустан ашкан учурда парацетамол же ибупрофен сыяктуу дене табын түшүрүүчү дарыларды колдонсо болот. Ошол эле учурда көп дозада парацетамол ичүү организмге терс таасир этерин эскертебиз", — деди Кутманова.
Инфекционист ар бир дары-дармек лабораториялык көрсөтмөнүн негизинде дайындалышы керектигин белгиледи.
COVID менен пневмония чогуу эсептеле баштады. Жуктургандардын саны 23 783 болду
"Вируска каршы дарылар сунушталбайт, алардын эффективдүүлүгү эч бир өлкөдө далилденген эмес. Төшөктө жата берүү туура эмес, тескерисинче, көп кыймылдап, көмкөрөдөн жатуу сунушталат. Оору башталган күндөрү гормоналдык дексаметазон жана башка ушул сыяктуу дарыларды ичүүгө болбойт. Ал эми антибиотиктер вирусту дарылоого колдонулбайт", — деп сунуштады адис.
Кутманова гормоналдык дарыларды жана антибиотиктерди колдонгон учурда организмдин коргонуу системасы алсызданып, вирус башка органдарга дагы жайылып кетиши мүмкүн экенин эскертти.
