БИШКЕК, 10-июл. — Sputnik. Кыргызстан коронавирусту аныктаган, так жыйынтыкты 30-45 мүнөттүн ичинде чыгарып берген инновациялык тесттерди алды. Бул тууралуу өкмөттөгү брифингде саламаттыкты сактоо министринин орун басары Мадамин Каратаев билдирди.
Анын айтымында, бул тесттер БУУнун өнүктүрүү программасы жана СПИД, кургак учук, малярия менен күрөш боюнча Глобалдык фонд тарабынан берилген.
"Бир саатта төрт анализ жүргүзсө болот. Алар 99 пайыз так жыйынтык көрсөтөт", — деди Каратаев.
Өкмөт: беш күндөн кийин 13 тез жардам унаасы жана 17 ИВЛ аппарат алып келинет
Ал ПРООНго ыраазычылык билдирип, Дүйнөлүк банк берген каражатка ушундай 50 миң тест алуу маселеси каралып жатканын кошумчалаган.
"Өлкө мындай тесттерге муктаж болуп жатат. Диагностиканы да эртелетүү максатында ушундай эле инновациялык тесттерди алууну чечтик. Булар тез жана так жыйынтык көрсөткөндүгү менен айырмаланат. Ошондой эле дарылоону убагында баштоого көмөктөшөт", — деди ПРООН долбоорунун координатору Инга Бабичева.
Маалым болгондой, 16-июнда ПРООНдун СПИД, кургак учук, малярия менен күрөш боюнча Глобалдык фонду тарабынан каржыланган "ВИЧке жана кургак учукка көзөмөл жүргүзүү" долбоору Саламаттыкты сактоо министрлигине 6 550 ПЦР-тест тапшырган.
