БИШКЕК, 30-июн. — Sputnik. Шайлоого катышкан партиялар, ар бир талапкер өз убадасы үчүн эртеби-кечпи, жооп берүүнү үйрөнүшү керек. Бул туурасында мамлекет башчы Сооронбай Жээнбеков парламентте кайрылуу жасап жатып билдирди.
Кимдин ким экени ушундай учурда билинет. Жээнбеков аткаминерлерге кайрылды
Мамлекет башчы шайлоо өнөктүгүн, саясий күрөштү өз жолу, өз нугу менен өткөрүп, мамлекеттин келечегине аяр мамиле кылууга чакырды.
“Ушул залда отурган депутаттардын көпчүлүгү кайрадан шайлоого аттанат деп ойлойм. Мен сиздерди да, калган бардык партияларды да шайлоону таза өткөрүүгө чакырам. Үгүт иштерин жүргүзүүдө ыплас шайлоо технологияларын пайдаланбай, “асмандагы айды алып берем” деп элди куру убада менен алдабай, реалдуу программанын негизинде шайлоо өткөрүү ар бир партиядан, ар бир талапкерден көз каранды”, — деди Жээнбеков.
Деген менен президент шайлоонун алдында ар кандай убадаларды берүү табигый көрүнүш экенин четке каккан жок. Бирок өлкө кызыкчылыгы, коомдун биримдиги, элдин ынтымагы баарынан бийик турарын эстен чыгарбоого үндөдү.
Эч кимге карызым жок! Жээнбеков колдоого алды делген партиялар боюнча жооп берди
Ошону менен катар мамлекет башчы элге кайрылып, партиялардын парламентке келер-келбесин берген добушу чече турганын белгиледи.
Эскерте кетсек, президент бүгүн парламентте жаңы дайындалган өкмөт мүчөлөрүнүн антын кабыл алды. Андан соң пандемияга жана алдыдагы шайлоолорго байланыштуу кыргызстандыктарга кайрылды.
