Батырбекова: биз өзүбүз жашаган коомду сыйлоого милдеттүүбүз
Көпчүлүк адамдар "пандемия учурунда эреже сактабай жүргөндөргө эскертүү берүү туурабы" деп сурап жатышат. Эгер ал кандайдыр бир көйгөй жаратуучу маселеде эреже сактабай жаткан болсо, анда аны тартипке чакыруу ар бир коом мүчөсүнүн парзы десек болот. Мындай пикирин Нуриза Батырбекова Sputnik Кыргызстан радиосуна маек куруп жатып билдирди.
Анын айтымында, учурда эл арасында бири-бирине агрессия менен мамиле кылуу күч алууда.
"Эреже эмнеге киргизилет? Ал ошол коомдун коопсуздугу үчүн убактылуу же дайым кабыл алынган жашоо образы. Ар бир өзүн сыйлаган адам муну аткарышы зарыл. Учурда коронавируска байланыштуу киргизилген тартипти коомдук жайларда сактабай жүргөн замандаштарыбыз да кезигүүдө. Аларды айрымдары жактырбай кагып-силксе, башкалары кайдыгер мамиле кылып өтүп кете беришет. Биз мындай учурга күбө болсок сый менен, жумшак гана ошол адамдан эрежени сактоону өтүнүшүбүз керек. Мындай мамиле ал адамда "менин ден соолугум башкага керекпи, мен ушул коомго керектүү турбаймынбы" деген ойду жаратат. Уялып же чын дилинен сиздин өтүнүчтү кабыл алып, андан ары эреже сактап калышы толук ыктымал. Негизи эле агрессия менен адам каалоосуна жете албайт. Өзгөчө бүтүндөй айлана-чөйрөдө психологиялык оор абал жаралып турганда биз бири-бирибизге камкордук менен, сый көрсөтүп, жумшак мамиле жасоого милдеттүүбүз", — деди Батырбекова.
Психолог ошондой эле элди өзү жашаган коомду сыйлоого жана вирустан сактануу боюнча дарыгерлердин талаптарын так аткарууга чакырды.
