БИШКЕК, 20-май — Sputnik. 11-класстар үчүн "Алтын тамга" тестирлөөсү 12-19-июнь күндөрү реалдуу режимде өтөт. Бул тууралуу Билим берүү жана илим министрлигинин маалымат кызматынан билдиришти.
Тестирлөө облустук борборлордо (Бишкек, Чүй, Ош, Жалал-Абад, Баткен, Талас, Нарын, Каракол) өткөрүлүп, имараттар дезинфекцияланат, социалдык аралык сакталып, ар бир бүтүрүүчү жеке коргонуучу каражаттар менен камсыздалат.
"Сынакты онлайн эмес, реалдуу форматта өткөрүүнүн бир нече себеби бар. Биринчиден, бүтүрүүчүлөр реалдуу режимде 10 жыл жана үч чейрек окушту, бир гана төртүнчү чейрек дистанттык түрдө жүргүзүлдү. Экинчиден, ар бир баалоо ишенимдүү жана объективдүү жүргүзүлүшү керек", — деп айтылат билдирүүдө.
Сынак учурунда ар бир бүтүрүүчүгө өзүнчө планшет берилет. Төрт предметтен тест тапшырып, бүтөрү менен жыйынтык чыгарылат. Ошентип жалпы жыйынтык менен бүтүрүүчү да, кабыл алып жаткан көз карандысыз эксперттер да дароо таанышат.
Быйылкы окуу жылында 1 420 бүтүрүүчү өзгөчө үлгүдөгү аттестат алуу үчүн ат салышат. Өткөн окуу жылында "Алтын тамга" сынагына 1051 окуучу катышып, 182 бүтүрүүчү артыкчылык аттестатын алган.
Белгилей кетсек, тестирлөө "Алтын тамга" аттестатын алам деген мыкты окуган балдар үчүн уюштурулат.
